Senattyń Halyqaralyq qatynastar, qorǵanys jáne qaýipsizdik komıtetiniń depýtattary Qarýly Kúshterdiń jaýyngerlik ázirligi men urys qabiletin arttyrýdy zańnamalyq qamtamasyz etý, problemalardy anyqtaý jáne olardy sheshý máseleleri boıynsha Qorǵanys mınıstrliginiń basshylyǵymen kezdesý ótkizdi, dep habarlady Senattyń baspasóz qyzmeti.
Senator Muhtar Qul-Muhammedtiń tóraǵalyq etýimen ótken kezdesýde ol Prezıdenttiń jyl basynda bergen tapsyrmalaryn ýaqtyly jáne sapaly zańnamalyq qamtamasyz etý qajettigin atap ótti.
Qorǵanys mınıstriniń orynbasary Sultan Qamaletdınov berilgen tapsyrmany iske asyrý barysy týraly depýtattarǵa aıtyp berdi. Ol terrorızmge qarsy operasııalardy júrgizý jáne daǵdarystyq jaǵdaılardy basqarýdyń biryńǵaı ortalyǵyn qurý kezinde laýazymdy tulǵalardyń is-qımyldaryn zańnamalyq deńgeıde retteý qajettigi týraly aıtty. Jastardyń áskerı qyzmetke degen yntasyn arttyrýǵa, áskerge shaqyrylatyn jastar men áskerı qyzmetshilerdi tárbıeleýde jańa tásilder men standarttardy qoldanýǵa baılanysty sharalarǵa erekshe nazar aýdardy.
Senator Sergeı Ershov óz sózinde árbir memlekettik organnyń rólin, mindetteri men fýnksııalaryn aıqyndaı otyryp, azamattardy áskerı-patrıottyq tárbıeleýdi uıymdastyrý qajettigin atap ótti. Ol sondaı-aq Qarýly Kúshterdiń jaýyngerlik jáne jumyldyrý daıyndyǵyn qajetti deńgeıde ustap turý, kúsh qurylymdary arasyndaǵy tıimdi úılestirýdi qamtamasyz etý jónindegi normalardyń ózara baılanysy turǵysynda zańnamalyq bazany júıeleýdiń mańyzdylyǵyn sóz etti.
Kezdesý barysynda parlamentshiler qorǵanys shyǵystaryn qarjylandyrýǵa, sondaı-aq áskerı ujymdardaǵy sybaılas jemqorlyqqa qarsy is-qımylǵa qatysty máselelerdi de kóterdi. Senattyń salalyq komıtetiniń tóraǵasy Muhtar Qul-Muhammed kezdesýdi qorytyndylaı kelip múddeli memlekettik organdarmen jáne jurtshylyqpen jekelegen usynystardy, onyń ishinde áskerge shaqyrý máselelerin sheshýge, merzimdi áskerı qyzmet ótkerýdi yntalandyrýǵa baǵyttalǵan usynystardy kelisýdiń mańyzdylyǵyn aıtty.