Atyraýda erekshe balalarǵa arnalǵan áleýmettik qyzmet kórsetý ortalyǵy bar. Byltyrǵy jeltoqsanda ortalyq janynan jylyjaı ashylǵan edi.
– Bizdiń ortalyqta tárbıelenetin erekshe balalar jylyjaıda gúl men kókónis ósiredi. Muny balalardyń oı-órisin keńeıtý, usaq motorıkany damytyp, qoǵamǵa beıimdelýi úshin qolǵa aldyq. Jaqynda balalar ózderi ósirgen qııardyń alǵashqy ónimin jınady, – deıdi ortalyq dırektory Anar Aıýpova.
Qazir ortalyqta 78 bala emdelip jatyr. Ortalyqtaǵy ashanada balalar taǵamnyń túr-túrin daıyndaıdy.
– Jylyjaı men baqshadan alynǵan ónimderdi satylymǵa shyǵarýymyz múmkin. О́ıtkeni bul balalardyń satý, qarjyny basqarý daǵdylaryn úırenýine yqpal etedi. Balalar qustardy da jaqsy kóredi. Sol sebepten, qus sharýashylyǵyn ashýdy josparlap otyrmyz, – deıdi pedagog-defektolog Sara Qýanyshova.
Atyraý oblysy