Áleýmettik jelilerde kúnine 65 000 teńgeden tabys tabýǵa bolatyny týraly «Halyqtyq IPO» baǵdarlamasynyń jarnamasy taratylýda. Bul – alaıaqtardyń isi, dep habarlaıdy Egemen.kz stopfake.kz-ke silteme jasap.
Jarnamalyq bannerde QR Prezıdentiniń fotosýreti jáne onyń «Halyqtyq IPO» baǵdarlamasynyń keńeıtilýi týraly dáıeksózi jazylǵan, onda ol eldiń ulttyq baılyǵy halyqqa tıesili ekeni aıtylǵan. Memleket basshysy bul týraly 2021 jyly aıtqan. Sol kezde ol «Halyqtyq IPO»-ny qaıta bastaýdy tapsyrdy. Búginde baǵdarlama qaıta qolǵa alynbaq, biraq oǵan áli qatysýǵa bolmaıdy.
Áleýmettik jelilerde taratylǵan jarnamanyń baǵdarlamaǵa eshqandaı qatysy joq ekenin «Samuryq-Qazyna» qory da rastady.
– Qazaqstan Respýblıkasy Úkimetiniń jekeshelendirý jospary sheńberinde IRO-ǵa shyǵarýǵa jatatyn iri kompanııalardyń aksıoneri retinde «Samuryq-Qazyna» qory feık aqparatta usynylǵan málimetterdiń shyndyqqa sáıkes kelmeıtinin habarlaıdy. Ázirshe qor naryǵyna «Eır Astana» jáne «QazMunaıGaz» kompanııalarynyń baǵaly qaǵazdaryn shyǵarý josparlanyp otyr. Bul kompanııalardyń aksııalaryn qor naryǵyna ornalastyrýdyń naqty kúnderi áli belgilengen joq jáne bul kapıtal naryqtaryndaǵy naryqtyq konıýnktýraǵa jáne kompanııalardyń jaǵdaıyna baılanysty. Bul rette qor naryǵyna shyǵarý josparlanyp otyrǵan ulttyq kompanııalardyń aksııalary boıynsha kiristilik naryq konıýnktýrasymen aıqyndalatynyn erekshe atap ótemiz, – dep habarlady qordyń baspasóz qyzmetinen.