Eki salmaqtaǵy álemniń burynǵy chempıony Andre Ýord pen Gennadıı Golovkın arasyndaǵy daýdan keıin biraz mamandar eki boksshy ózara jekpe-jek ótkizse degen tilek bildirgen bolatyn. Alaıda The Ring jýrnalynyń jýrnalısti Maıkl Montero AQSh boksshysynyń «zeınetten» oralmaıtynyn aıtty, dep habarlaıdy Egemen.kz sports.kz-ke silteme jasap.
«Shyntýaıtyna kelsek, Andre Ýord ózin «zeınetker» retinde óte jaqsy sezinip júrgeni ras. Ol kommentatorlyq jumysty jaqsy atqara alatynyn dáleldep tastady. Sondyqtan ol Golovkınmen kezdesý ótkizý úshin rıngke oralmaıdy», dep jazdy sarapshy áleýmettik jelilerde. Rasynda da 2017 jyly kásibı mansabyn aıaqtaǵan boksshynyń arada bes jyl ótkennen keıin rıngke orala qoıýy ekitalaı sekildi. Alaıda aqsha ne istetpeıdi, kim bilsin...