Qostanaıda 28 aqpan kúni ult ustazy A.Baıtursynulynyń 150 jyldyǵyna oraı Ahmet jylynyń ashylý rásimi ótedi. Saltanatty is-sharaǵa Májilis depýtaty Berik Ábdiǵalı, Qazaqstan Jazýshylar odaǵynyń tóraǵasy Ulyqbek Esdáýlet, elordadaǵy Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń dırektory Erbol Tileshov, Almaty qalasyndaǵy Ahmet Baıtursynuly memorıaldyq mýzeı-úıiniń dırektory Raıhan Imahanbet arnaıy kelip qatysady dep josparlanyp otyr.
Al 25-26 aqpan kúnderi «Qostanaı Plaza» saýda-saýyq ortalyǵynda «Ulttyń uly ustazy» atty ınteraktıvti is-shara ótedi. Bul kúni mektep oqýshylary daıyndaǵan ádebı-kórkem kompozısııa kópshilik nazaryna usynylyp, Ahań óleńderi oqylady. Sondaı-aq qala turǵyndary Alash arysynyń mereıtoıyna oraı uıymdastyrylǵan konserttik baǵdarlama men teatrlandyrylǵan sahnalyq qoıylymdy tamashalaıdy. Merekege kelgen kópshilik úshin Ahmet Baıtursynulynyń ómiri men shyǵarmashylyǵyna arnalǵan vıktorına oıyndaryna da qatysa alady.
Sonymen qatar dál osy kúni «Poısk» tanymdyq kvest oıyny men «Masa» Youtube-jobasynyń tusaýkeseri ótedi.
Ahmet jylynyń ashylýyna arnalǵan negizgi is-sharalar aldaǵy dúısenbide 28 aqpanda bastalady. Saǵat 11.00-de, bir mezgilde oblys qalalary men aýdandaryndaǵy Ahmet Baıtursynuly eskertkishterine gúl shoqtary qoıylady. Saǵat 11.15-te A.Baıtursynov atyndaǵy Qostanaı óńirlik ýnıversıtetinde «Ult ustazy» atty dóńgelek ústel bastalady. Is-shara aıasynda aqyn, ǵalym Serikbaı Ospanovtyń «Ult ustazy» kitabynyń tusaýkeseri ótetin bolady.
Tústen keıin A.Baıtursynov atyndaǵy Qostanaı óńirlik ýnıversıtetinde, Ybyraı Altynsarın memorıaldyq mýzeıinde, I.Omarov atyndaǵy qazaq drama teatrynda, «Dostyq úıinde» jáne Balalar shyǵarmashylyq úıinde ahmettaný dáristeri ótedi.
Al keshkilik saǵat 16.00-de Jastar saraıynda Ahmet Baıtursynulyna arnalǵan mereıtoıdyń ashylý rásimi bastalady. Saltanatty is-shara sheńberinde ótetin ádebı-sazdy keshte Ahańnyń án-kúıleri oryndalyp, óleńderi oqylady. Sondaı-aq I.Omarov atyndaǵy Qostanaı qazaq teatry daıyndaǵan kemeńger ómirinen alynǵan teatrlandyrylǵan qoıylym kópshilikke usynylady.
Qostanaı oblysy