Nur-Sultan qalasynda qazaq til bilimi jáne ádebıettaný ǵylymdarynyń negizin salýshy ǵalym, ulttyq jazýdyń reformatory, ult ustazy, Alashtyń rýhanı kósemi Ahmet Baıtursynulynyń 150 jyldyq mereıtoıyn merekeleýdiń saltanatty ashylý rásimi ótti, dep habarlaıdy Egemen.kz Aqordanyń resmı saıtyna silteme jasap.
Mereıtoıdyń saltanatty ashylý rásimi «Alash qaıratkerleri» eskertkishine gúl shoqtaryn qoıyp, ult qaıratkerine qurmet kórsetýden bastaldy.
Q. Qýanyshbaev atyndaǵy Memlekettik akademııalyq qazaq mýzykalyq-drama teatrynda «Ahmet Baıtursynuly – Alashtyń rýhanı kósemi» atty halyqaralyq ǵylymı-tájirıbelik konferensııa ótti. Oǵan Qazaqstan Respýblıkasynyń Memlekettik hatshysy Erlan Qarın qatysyp, sóz sóıledi.
– Biz Alash qaıratkerleriniń dara jolynan ónege alyp qana qoımaı, ony árdaıym basty baǵdar etip ustanamyz. О́ıtkeni Ahań sııaqty jasampaz tulǵalardyń eńbegi táýelsizdik qundylyqtarymen tikeleı astasyp jatyr. «El – búginshil, meniki – erteń úshin» demeıtin be edi Ahańnyń ózi. Biz – sol Ahań dál jetkizip aıtqan erteńde ómir súrip jatqan jáne ony bolashaqqa jalǵaıtyn urpaqpyz, – dedi Memlekettik hatshy.
Konferensııada sóz alǵan IýNESKO-nyń Almaty qalasyndaǵy Klasterlik bıýrosynyń basshysy Krısta Pıkkat Ahmet Baıtursynulyn álemdik deńgeıdegi tulǵa retinde atap ótti.
Jıynǵa Parlament depýtattary, Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi memlekettik komıssııa músheleri, zııaly qaýym ókilderi, otandyq jáne sheteldik alashtanýshy, ahmettanýshy ǵalymdar, qoǵam qaıratkerleri qatysty. Ǵalymdar M. Qoıgeldıev, A. Ismaqova, Sh. Qurmanbaıuly, D. Qamzabekuly, A. Fazyljanova jáne Nasımı atyndaǵy Ázerbaıjan ulttyq ǵylymı akademııasy Til bilimi ınstıtýtynyń dosenti E. Ibragımov baıandama jasady.
«Ahmet Baıtursynuly jáne qazaq til biliminiń máseleleri», «Ahmet Baıtursynuly jáne qoǵamdyq-gýmanıtarlyq ǵylymdar» taqyryptarynda ótken seksııalyq otyrystarda 20-dan astam otandyq jáne sheteldik ǵalymdar ult ustazy týraly jan-jaqty baıandama jasady.