О́tken demalys kúnderi fýtboldan Reseı chempıonatynyń oıyndary qysqy úzilisten keıin qaıta jalǵasty. Qazaqstan ulttyq quramasynyń oıynshysy Baqtıer Zaınýtdınov óner kórsetetin Máskeýdiń SSKA klýby 19-týrda «Spartakpen» kezdesti.
Máskeýlik komandalardyń bul jolǵy derbıi áskerılerdiń jeńisimen aıaqtaldy – 2:0. Bul oıyndaǵy SSKA-nyń jeńisine jerlesimiz óz úlesin qosyp, «Spartak» qaqpasyna kezekti golyn soqty. 49-mınýtta Iýsýf Iаzydjı aıyp dobyn sátti oryndap, SSKA-ny esepte alǵa shyǵarsa, B.Zaınýtdınov 79-mınýtta Ivan Oblıakovtyń ádemi pasynan keıin tablodaǵy kórsetkishti 2:0-ge jetkizdi. Bul – otandasymyzdyń «Spartakqa» salǵan úshinshi goly. Buǵan deıin jartylaı qorǵaýshymyz «Rostov» sapynda júrgende de Máskeý klýbynyń qaqpasyna dýbl jasaǵan edi.
Aıta keteıik, matchty qosalqy quramda bastaǵan B.Zaınýtdınov ekinshi taımnyń 56-mınýtynda alańǵa shyqqan bolatyn. Jańa jyldaǵy alǵashqy matchta úsh upaıyna qol jetkizgen SSKA týrnır kestesinde 4-orynda keledi.