Partııamyzdyń kezekten tys XXII sezinde Prezıdentimiz Q.K.Toqaev elimizdegi jetekshi saıası uıymdy odan ári jańǵyrtýdyń naqty baǵyt-baǵdaryn belgilep berdi.
Partııa Tóraǵasy uıymnyń ataýyn Amanat dep ózgertý týraly usynysqa qoldaý bildirdi. Bul sóz – halqymyz úshin tereń maǵynalyq mánge ıe kıeli uǵym. Ol memlekettiligimizdi jáne Táýelsizdigimizdi saqtaý jolynda babalarymyz ben bolashaq urpaq aldyndaǵy jaýapkershilikti arttyratyn qasıetti paryz degendi bildiredi.
Rebrendıng pen jańa ataý partııada bolyp jatqan aýqymdy ózgeristerdiń bir bólshegi ǵana. Bul iste mańdaıshadaǵy jazýdy ózgertýmen sharýa bitpeıtini belgili. Sondyqtan saıası uıymnyń qyzmeti men jumys tásilin júıeli túrde ózgertý asa mańyzdy.
Partııa barsha qazaqstandyqtyń múddesin qorǵaıtyn negizgi uıym retindegi jumysyn jalǵastyra beredi. Memleket basshysy atap ótkendeı, Amanat ádildiktiń, birlik pen alǵa ilgerileýdiń, halyqtyń pikiri men el múddesin eskeretin, azamattarymyzdyń ıgiligi jolynda qyzmet etetin partııa bolýǵa tıis.
Ol úshin partııa jumysyndaǵy negizgi basymdyq ortalyqtan jergilikti deńgeıge, ıaǵnı óńirlik fılıaldar men bastaýysh partııa uıymdaryna oıysý kerek. Uıym úshin saılaýshylarmen jumys isteý, azamattardy alańdatqan máselelerge nazar aýdarý, halyqtyń muń-muqtajyna qulaq túrip, ony tıisti deńgeıge jetkizý asa mańyzdy. Iаǵnı Amanat, shyn máninde, halyq pen atqarýshy bılik arasyndaǵy altyn kópirge aınalýy qajet.
Osy rette partııa Tóraǵasy jumys barysynda bıýrokratııadan, formalızmnen jáne qaǵazbastylyqtan úzildi-kesildi bas tartý asa mańyzdy mindet ekenin aıryqsha atap ótti. Tyń bastamalar tek ortalyqtyń nusqaýymen ǵana qolǵa alynbaýy kerek. Kún tártibin ázirleýge partııanyń jergilikti jerlerdegi músheleri de belsendi atsalysýy qajet. Ásirese, bastaýysh partııa uıymdarynda mańyzdy máselelerdi talqylap, olardy sheshý joldaryn usynýǵa múmkindikter bar. О́ıtkeni olar elmen tikeleı baılanysta bolǵandyqtan, kópshiliktiń kókeıindegi ózekti problemalardy jaqsy biledi. Sondyqtan bastaýysh partııa uıymdarynyń áleýetin keńinen paıdalaný kerek.
Keıbir zań jobalary qoǵamda qyzý pikirtalas týdyratyny belgili. Partııalyq ınstıtýttar arqyly áleýmettik mańyzy joǵary sondaı normalardy talqylaýǵa jurtshylyq pen óńirlerdegi belsendi azamattardy jumyldyrý qajet.
Prezıdentimiz belgilep bergen mindetterdiń mańyzdy bóligi kadr daıarlaý jáne áleýmettik lıft qalyptastyrý máselelerine qatysty boldy. Jańarǵan partııa belsendi jastar úshin saıası menedjment mektebine aınalýǵa tıis. Partııa qyzmeti kóshbasshylyq qasıetterdi qalyptastyrýǵa, azamattarmen tıimdi keri baılanys ornatýǵa jáne oryn alǵan máselege baılanysty jedel ún qatýǵa zor múmkindikter beredi.
Budan bylaı Amanat Memleket basshysynyń elimizdi jańartý baǵdaryn iske asyrýǵa belsendi qatysyp qana qoımaı, áleýmettik-ekonomıkalyq jáne saıası qaıta jańǵyrýdyń tiregi ári ózegi retinde jumys isteıdi. Prezıdentimiz jáne partııa Tóraǵasy Q.Toqaev barsha partııalastardy tyń ıdeıalar men usynystar jınaý jónindegi respýblıkalyq aksııa uıymdastyrýǵa, reformalardy ázirleý jáne jańa basymdyqtardy aıqyndaý isine belsendi qatysýǵa shaqyrdy.
Osylaısha, partııany transformasııalaý demokratııalyq jańarý jáne jańa ádiletti Qazaqstan qurý jolyndaǵy asa mańyzdy qadam bolatyny sózsiz.
Aldaǵy ýaqytta barlyq partııalastardyń partııa Tóraǵasy aıqyndap bergen basymdyqtardy iske asyrý úshin judyryqtaı jumylyp áreket etýi asa mańyzdy. Bul iske Senat depýtattary da úles qosyp, eldik múdde jolyndaǵy qyzmetterin belsendi túrde jalǵastyra beredi.
Máýlen ÁShIMBAEV,
Parlament Senatynyń Tóraǵasy