QR Parlamenti Májilisiniń Tóraǵasy Erlan Qoshanov basqarýshy partııanyń jańa ataýyn tirkeý máselesine qatysty pikir bildirdi, dep habarlaıdy Egemen.kz.
Májilistiń jalpy otyrysynan keıin jýrnalıster Palata tóraǵasyna basqarýshy partııanyń jańa ataýyn tirkeýge qatysty birqatar suraq qoıdy.
Palata Spıkeri atap ótkendeı, zańnama turǵysynan tirkeý prosesinde qıyndyqtar bolmaıdy.
«Biz máseleni zerttegen kezde «Amanat» dep atalatyn 30-dan astam túrli uıym bar ekeni belgili boldy, biraq bul ataýmen eshqandaı partııa tirkelgen joq. Sondyqtan, «AMANAT» atty partııany tirkeýde qıyndyqtar bolmaıdy dep oılaımyn», dep túsindirdi Erlan Qoshanov.
Májilis Tóraǵasy «Nur Otan» partııasy burynǵy ataýynan nege bas tartqanyn túsindirdi.
«Negizinde ómir men qoǵam ózgerip jatyr, sizder osyny kórip otyrsyzdar. Eger ótken jyldyń jeltoqsany men osy jyldyń qańtarynda bolǵan oqıǵaǵa qarasaq, biz basqa memlekette turyp jatqan sııaqtymyz. Sondyqtan búginde qoǵamnyń suranysy da ózgerýde. Qańtar qasiretinen keıin qoǵam da ózgerdi. Al partııa músheleri munyń bárin eskere aldy», dedi ol.
Erlan Qoshanov atap ótkendeı, depýtattar turǵyndardyń kóńil-kúıleri men suranystary nazarǵa alynǵan óńirlerge bardy. Búginde partııany ǵana emes qoǵamdy da jańartý qajettiligi bar.
«Osynyń bárin negizge ala otyryp, partııa músheleri tıisti sheshim qabyldady jáne partııa Tóraǵasy ony qoldady», dep túıindedi Májilis Spıkeri.