QR Premer-Mınıstri Álıhan Smaıylovtyń ókimimen QR Úkimeti janyndaǵy Daǵdarysqa qarsy sharalar jónindegi Jedel Shtab quryldy, dep habarlaıdy Egemen.kz Primeminister.kz-ke silteme jasap.
Jedel Shtab Reseı Federasııasyna sanksııalar paketiniń salynýyna jáne olardyń Qazaqstan ekonomıkasyna tıgizer áserine baılanysty ekonomıka jáne kásipkerliktegi problemalyq máselelerdi sheshetin bolady.
Shtab quramyna negizgi memlekettik organdardyń birinshi basshylary, kásipkerlik qaýymdastyǵynyń ókilderi men salalyq sarapshylar kirdi. Otandyq bıznes pen sarapshylar qaýymdastyǵynyń basqa da ókilderi Jedel Shtabtyń aldaǵy jumysyna qatysa alady.
Búgin QR Premer-Mınıstriniń birinshi orynbasary Roman Sklıardyń tóraǵalyǵymen Jedel Shtabtyń alǵashqy otyrysy ótti, onda kólik jáne logıstıka, kontragentter arasyndaǵy ózara esep aıyrysý máseleleri, sondaı-aq otandyq bıznestiń basqa da máseleleri talqylandy.