Qasym-Jomart Toqaev Bas prokýratýranyń basshylyq quramymen beınebaılanys arqyly keńes ótkizip, jańadan taǵaıyndalǵan Bas prokýror Berik Asylovty tanystyrdy, dep habarlaıdy Egemen.kz Aqordaǵa silteme jasap.
Prezıdent burynǵy Bas prokýror Ǵızat Nurdáýletovke atqarǵan jumysy úshin rızashylyǵyn bildirip, onyń jańa qyzmetine tabys tiledi.
Memleket basshysy qoǵamnyń basty talaby zańdardyń qatań saqtalýy ekenine toqtaldy. Qasym-Jomart Toqaevtyń aıtýynsha, qazir prokýratýra organdaryna júktelgen eń úlken mindet – qańtar oqıǵasyna qatysty jaǵdaılardy muqııat ári jan-jaqty tergep-tekserý. Prezıdent keńeste tergep-tekserý jumystary barysynda zańdylyqty qamtamasyz etip, azamattardyń quqyqtaryn saqtaý qajet ekenine nazar aýdardy. Sonymen qatar kináli adamdarǵa qatysty jaýapkershilik sharalaryn qabyldaı otyryp, rastalǵan árbir habarlamaǵa der kezinde mán berýdi, tergeý barysy jóninde halyqqa ýaqtyly aqparat taratýdy tapsyrdy.
Sondaı-aq Bas prokýratýraǵa eskirgen tásilderden arylyp, antıgýmanıstik qatynastarǵa qatysty jaýapkershilikti kúsheıtetin usynystar ázirleý tapsyryldy.
Prezıdenttiń aıtýynsha, saladaǵy jumysty ilgeriletý úshin qoǵamnyń qoldaýyna ıe bolatyn jańa ıdeıalar men ádis-tásilder, jańasha oılaıtyn mamandar qajet.