Memleket basshysynyń tóraǵalyǵymen Reformalar jónindegi joǵary keńestiń kezekti otyrysy ótti, dep habarlaıdy Egemen.kz.
Jıyn geosaıası jaǵdaıdyń Qazaqstanǵa tıgizetin keri áserine tótep berýge baǵyttalǵan qajetti sharalar toptamasyn talqylaýdan bastaldy.
Jıyn barysynda atalǵan másele boıynsha Premer-Mınıstr Álıhan Smaıylov, Ulttyq bank tóraǵasy Ǵalymjan Pirmatov, Prezıdenttiń ekonomıkalyq damý máseleleri jónindegi shtattan tys keńesshisi, Reformalar jónindegi keńes tóraǵasynyń orynbasary Ser Sýma Chakrabartı jáne Úkimet músheleri baıandama jasady. Sondaı-aq «Atameken» Ulttyq kásipkerler palatasy prezıdıýmynyń tóraǵasy Raıymbek Batalov bıznes tarapynyń usynystaryn ortaǵa saldy.
Prezıdenttiń aıtýynsha, Úkimet qurǵan Daǵdarysqa qarsy sharalardy úılestirýdiń jedel shtaby Reseıge salynǵan sanksııalardyń Qazaqstannyń ekonomıkalyq salalaryna tıgizetin áserin jan-jaqty taldaýǵa, jaǵdaıdyń qalaı órbıtinine qarap shara qabyldaýǵa, sondaı-aq aldaǵy is-qımyldardyń biryńǵaı josparyn jasaýǵa tıis. Memleket basshysy Úkimetti bul baǵytta shuǵyl áreket etýge jáne bıznes qoǵamdastyqpen tyǵyz baılanysta jumys isteýge shaqyrdy.
Qasym-Jomart Toqaev ekonomıkalyq taldaý negizinde kásiporyndardy, qajet bolǵan jaǵdaıda, halyqtyń jekelegen toptaryn qoldaý sharalarynyń toptamasyn daıyndaýdy tapsyrdy. Sondaı-aq bıylǵy respýblıkalyq bıýdjet qaıta qaraldy.
Joǵary keńestiń negizgi otyrysy aıasynda úsh másele qarastyryldy. Olar: memlekettik bıýdjettiń kiris bóligin kúsheıtý, ınvestısııalyq saıasatty jetildirý, «Samuryq-Qazyna» aksıonerlik qoǵamyn reformalaý.
Memlekettik bıýdjettiń kiris bóligin kúsheıtý jónindegi birinshi másele boıynsha Ulttyq ekonomıka mınıstri Álibek Qýantyrov baıandama jasady. Onyń aıtýynsha, bıýdjetke túsetin qosymsha kiristerdi qamtamasyz etý maqsatymen qatty paıdaly qazbalardyń úsh túrine salynatyn paıdaly qazbalar óndirisi salyǵynyń mólsherlemesin ortasha eseppen 3 ese ósirý usynylady. Bul bıýdjetke túsetin kiristi 300 mıllıard teńgege arttyrýǵa múmkindik beredi.
Mınıstr kapıtaldy syrtqa shyǵarýǵa jol bermeý, sheteldik kompanııalardyń tabysyna jáne sıfrlyq maınıngke salyq salý sharalaryn engizýdi usyndy. Budan bólek memlekettik bıýdjetke túsetin qosymsha kirister transferttik baǵa belgileýdi qadaǵalaý sharalaryn, keden men salyq baqylaýyn kúsheıtýdi qamtamasyz etýge baǵyttalǵan.
Qasym-Jomart Toqaev baıandama qorytyndysy boıynsha Úkimetke, ınvestorlyq qoǵamdastyqpen birlesip, halyqaralyq salyq jáne transferttik baǵa belgileý máselelerin muqııat pysyqtaýdy tapsyrdy.
Sonymen qatar otyrysta ınvestısııalyq saıasattyń jańa tásilderin qalyptastyrý máselesi qarastyryldy. Investısııalyq saıasat tujyrymdamasy aıasynda ınvestısııalyq ekojúıeni odan ári damytý, jeke sektordyń ınvestısııalyq belsendiliginiń artýyna yqpal etý jáne baǵa belgileýdiń jahandyq tizbegin tereń ıntegrasııalaý jumystaryn júrgizý qarastyrylǵan.
«Samuryq-Qazyna» aksıonerlik qoǵamyn reformalaý barysy jóninde basqarma tóraǵasy Almasadam Sátqalıev esep berdi. Ol satyp alý úderisiniń ashyqtyǵyn qamtamasyz etý, munaı, gaz óńdeý, kómir jáne elektr qýatyn óndirý men olardyń marketıngi naryǵynyń qatysýshylary úshin kedergilerdi joıý sııaqty baǵdarlamanyń negizgi basymdyqtaryn atap ótti. Sonymen birge kadrlyq saıasat qaıta qaralyp, basqarý personaly ońtaılandyrylǵan. «QazMunaıGaz» AQ, «Eır Astana» AQ, «KEGOC» AQ, «QazaqGaz» AQ sııaqty kompanııalar IPO-ǵa shyǵarylady. Sonyń arqasynda «Samuryq-Qazyna» Ulttyq qorǵa 500 mıllıard teńge bóle alady.
Baǵdarlama boıynsha 8 mıllıard AQSh dollarynan astam sapaly ınvestısııa tartý, jalpy quny 4 trıllıon teńgege jańadan 24 óndiris ornyn ashý jáne 5000 jańa jumys ornyn ashý kózdelýde. Árbir portfeldik kompanııa úshin qyzmettiń tıimdiligin arttyrý boıynsha usynystar ázirlenip, jetkizý baǵdarlary ońtaılandyrylady, sondaı-aq sybaılas jemqorlyqqa qarsy sharalar qabyldanady. Mysaly, qor kásiporyndaryna elektr qýatyn jetkizý úderisine qatysatyn 44 deldalmen aradaǵy shartty buzý josparlanyp otyr. Osy sharalardan keıin ekonomıkalyq tıimdilik bıyldyń ózinde 2 mıllıard teńgeden asady.