Kásipqoı bokstaǵy Qazaqstannyń shoqjuldyzy, orta salmaqtaǵy IBF jáne IBO tujyrymdary boıynsha álem chempıony Gennadıı Golovkın (41-1-1, 36 KO) dál osy salmaq dárejesindegi WBA Super belbeýiniń ıegeri japonııalyq Rıota Mýratamen (16-2, 13 KO) ótetin jekpe-jektiń resmı kúni belgili boldy. Orta salmaqtyń úsh belbeýi úshin bolatyn aıqas 9 sáýirde Japonııanyń Saıtama qalasyndaǵy 37 myń jankúıer syıatyn Saitama Super Arena sport kesheninde ótedi.
Boks jankúıerleriniń esinde bolsa, eki boksshy buǵan deıin 2021 jyldyń 29 jeltoqsanynda judyryqtasýǵa tıis edi. Alaıda pandemııaǵa baılanysty bul aıqas belgisiz merzimge shegerilgen bolatyn. Sol kezde Japonııa bıligi koronavırýs indetine baılanysty jańa qaýly qabyldap, onda shetel azamattarynyń elge kirýine tyıym salynǵan-dy.
Osylaısha, araǵa eki aı salyp qos taraptyń promoýterleri jekpe-jektiń jańa ýaqytyn belgiledi. Bul týraly kúni keshe eki boksshy ózderiniń áleýmettik jelidegi paraqshalarynda málimdedi. Bir qyzyǵy, jekpe-jekten bir kún buryn, ıaǵnı 8 sáýirde Gennadıı Golovkın 40 jasqa tolady.
Jerlesimiz keıingi jekpe-jegin 2020 jyldyń jeltoqsanynda polshalyq Kamıl Sheremetamen ótkizgen bolatyn. AQSh-tyń Florıda shtatyndaǵy Seminole Hard Rock Hotel & Casino arenasynda uıymdastyrylǵan aıqasta otandasymyz qarsylasyn jetinshi raýndta tehnıkalyq nokaýtpen jeńgen edi.
Al Rıota Mýrata bolsa, sońǵy ret sharshy alańǵa 2019 jyldyń jeltoqsanynda kóterildi. Sol jyly ol kanadalyq Stıven Batlermen (28-1-1) óz elinde judyryqtasyp, besinshi raýndta tehnıkalyq nokaýtpen basym túsken bolatyn.
Amerıkalyq jýrnalıst Maık Koppındjerdiń málimeti boıynsha jekpe-jek keshi Japonııa telearnasyndaǵy praım-taım ýaqytyna belgilegen. Al keshtiń basty aıqasy jergilikti ýaqyt boıynsha 22:20-ǵa josparlanǵan bolsa, qazaqstandyq jankúıerler bul kezdesýdi Nur-Sultan ýaqyty boıynsha keshki 19:20-da kóre alady.