Halyqaralyq áıelder kúni qarsańynda dóńgelek ústel otyrysynda áıelderdi qorǵaýdy qamtamasyz etý jáne olardyń janjaldardyń aldyn alýdaǵy rólin kúsheıtý máseleleri talqylandy, dep habarlaıdy Egemen.kz.
Otyrys jumysyna QR Prezıdenti Ákimshiligi Basshysynyń orynbasary Aıda Balaeva, Qazaqstandaǵy adam quqyqtary jónindegi ýákil Elvıra Ázimova, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lazzat Ramazanova, memlekettik organdardyń, halyqaralyq uıymdar men dıplomatııalyq korpýstyń ókilderi qatysty.
Prezıdent Ákimshiligi Basshysynyń orynbasary Aıda Balaeva atap ótkendeı «Álemdegi qazirgi jaǵdaı shıelenisken qarama-qaıshylyq pen turaqsyzdyqpen sıpattalady. Teris saldary búkil aımaqtarǵa qaýip tóndiredi, turaqsyzdyqty jáne jahandyq qaýipti týdyrady. Bul turǵyda BUU Qaýipsizdik Keńesiniń «Áıelder, beıbitshilik jáne qaýipsizdik» kún tártibi asa mańyzdy.
BUU Qaýipsizdik Keńesiniń toǵyz qararyn iske asyrý maqsatynda Qazaqstan Úkimeti ótken jyldyń jeltoqsan aıynda 2025 jylǵa deıingi is-sharalar josparyn bekitti. Jospar janjaldardyń aldyn alý men retteýge, beıbitshilik pen qaýipsizdikti qamtamasyz etýge, Áıelderge qarsy zorlyq-zombylyqtyń aldyn alýǵa, habardar bolýdy arttyrýǵa, janjaldardyń aldyn alý jáne áıelderdi qorǵaý máselelerinde azamattyq qoǵammen ózara is-qımyldy kúsheıtýge áıelderdiń teń quqyly qatysýyn qamtamasyz etý boıynsha naqty sharalardy júrgizýdi qamtıdy.
«Qazaqstan áıelderdi qyzmettiń barlyq salalarynda ilgeriletý úshin tıimdi ınstıtýsıonaldyq sharalar qabyldaý deńgeıinde belgili bir jetistikterge qol jetkizdi. Elimizde 2030 jylǵa deıingi otbasylyq jáne genderlik saıasat tujyrymdamasy iske asyrylyp, jetildirilýde. Áıelderdiń teńdigi men quqyqtary men múmkindikterin keńeıtý salasynda Ortalyq Azııa bilim ortalyǵyn qurý boıynsha jumys júrgizilýde. Áıelder eńbegin paıdalanýdy shekteıtin tizimdi tolyq joıý týraly progressıvti sheshim qabyldandy», dep atap ótti Aıda Balaeva.
О́z kezeginde Elvıra Ázimova jospardyń negizgi is-sharalaryna toqtalyp, áıelderdiń aldyn alý dıplomatııasy men qalpyna keltirý prosesteriniń belsendi qatysýshylary bolýy úshin olardyń áleýetin nyǵaıtýdyń zańnamalyq jáne praktıkalyq quraldaryn ázirleý qajettigi týraly málimdedi.«Qaýipsizdik máselelerin qarýmen emes, bitimgershilik tetikteri arqyly sheshýge bolady jáne qajet. Sońǵy oqıǵalar áıelderdi preventıvti dıplomatııa men deldaldyq daǵdylaryna oqytý prosesin kúsheıtý, memlekettik organdar ókilderi men azamattyq qoǵam ókilderi qatarynan kelissóz júrgizýshiler pýlyn qalyptastyrý qajettigin dáleldeıdi. Basty maqsat – qaqtyǵystardy retteýdiń beıbit quraldaryn tıimdi paıdalanýǵa úıretý jáne olardy zań deńgeıinde qoldanýdyń naqty ssenarııin bekitý», dep atap ótti Elvıra Ázimova.
Ol sondaı-aq Qazaqstanda tótenshe jaǵdaı kezinde áıelderge kómek kórsetý úshin memlekettik organdar, áleýmettik qyzmetter men ÚEU ózara is-qımylynyń naqty tetigin engizý qajet ekenin aıtty.
Dóńgelek ústelge qatysýshylar ulttyq jospardy qabyldaý áıelderdiń qaýipsizdik pen quqyqtyq tártiptiń kún tártibine qatysýy úshin jaǵdaı jasaý arqyly qoıylǵan mindetterge tıimdi qol jetkizýge bolatyndyǵyn túsinetindigin kórsetti.