Keıingi ýaqyt Qazaq eli, qazaq qoǵamy úshin de asa bir aýyr synaqtyń, óte jedel, susty kúnderdiń kezeńi boldy. Qańtar alasapyrany qazaq tarıhynyń qazaly bir beti bolyp qalady.
«... Jaqyndap ajal tursa da, janyńa qylysh ursa da, qaljyrap, kóńili qaraıyp, qara bir kózin jumsa da, ómirge toımas adamzat!» demeı me Buqar jyraý babamyz.
Adam ómirinen qymbat ne bar? Qazaqstan Prezıdenti Qasym-Jomart Toqaev «Qańtar qasiretinen» keıin birneshe márte suhbat berip, ashyq túrde barlyq jaǵdaıdy saralap, shuǵyl arada júzege asyrylýǵa tıis barlyq sharany aıqyndap, belgilep berdi. Zobalańdy syn-synaqtan ótken halyq Prezıdentke senedi.
Bizdiń bolashaǵymyzdyń, eldiń eldiginiń búgingi tańdaǵy jalǵyz kepili – el Prezıdenti. Ol osy maqsat-múddelerdi eskere otyryp, «Jańa Qazaqstan» ıdeıasyn júzege asyrý baǵyttaryn alǵa tartty. Sol jańarý men jańǵyrýdy baıtaǵymyz tolyq sezingende ǵana baıraǵymyzdyń túzý jelbireıtinin buqaraǵa sezindire aldy.
Saıası uıymnyń ataýyn Amanat partııasy dep ózgertken quryltaıda Qasym-Jomart Toqaev: «Ashyǵyn aıtqanda, qazirgi kezde saıası menedjerlerdi daıarlaý isi aqsap tur. Qazirgi jaǵdaıda saıası basshylar túrli mamanmen, jastarmen, jýrnalıstermen, halyqtyń barlyq ókilimen til tabysa alýy kerek. Mundaı adamdar el arasynda az emes. Áleýmettik lıftiniń joqtyǵy – birden-bir kedergi», deı kelip, jas ári qabiletti mamandarǵa múmkindik berý jaıyn aıtty. О́te quptarlyq usynys.
Osy jerde bilimdi saıası menedjerlerdiń qarapaıym adamdardyń jan-júregine úńile alatyn, olarmen dıdarlasýǵa múmkindik tabatyn qasıetterine de úńilý kerek. Galstýk baılap, shirenip qatyp qalǵan sheneýniktiń kúni ótkenin anyq sezindik. «Jańa Qazaqstanǵa» jańasha minez, jańasha bolmys qalyptastyrý mańyzdy.
Men qalamger retinde elimizdiń túkpir-túkpirin, alys aýyldardy kóbirek aralaımyn. Qoǵamdyq formasııalardyń almasýy sol aýyldardyń da jan-dúnıesin, bolmys-tabıǵatyn qatty ózgertip jiberdi. «Jańa Qazaqstanda» qanaǵat, raqym, izgilik, meıirim sekildi ultty saqtap turatyn uly uǵymdar alǵa shyǵýy kerek. Jastardyń boıyna elin, Otanyn súıetin patrıottyq qasıetterdi sińirý kezek kúttirmeıtin mindet bolýǵa tıis. Aǵalar alqasyn, aqsaqaldar ınstıtýtyn jandandyrý – ult bolyp uıysýdyń alǵysharty.
Qazaqta «Esi kirgen eskisin izdeıdi» degen naqyl bar. «Myń ólip, myń tirilgen» bizdiń halyqtyń kósh-kerýenin aq jaýlyqty analardyń aq tilegi, aqsaqaldy qarııalardyń aq batasy túzý jolǵa salyp otyrǵan.
Memlekettiń qaýipsizdigin, aýmaqtyq tutastyǵymyzdy, eldiń áleýmettik-ekonomıkalyq damýyn ustanym etken «Jańa Qazaqstan» ıdeıasyna da, Amanat-tyń alda atqarar aýqymdy jumystaryna da sáttilik deımin.
Jarqyn kúnderdiń jylnamasyn birge jazýǵa jazsyn.
Ǵalym JAILYBAI,
aqyn, Qazaqstannyń eńbek sińirgen qaıratkeri