Azamattyq bastamalardy qoldaý ortalyǵy názik jandylardyń múmkindigin keńeıtip, qarym-qabiletin jan-jaqty kórsetýge septesetin áleýmettik joba qolǵa alynǵanyn habarlady. «Zamandas 21» qoǵamdyq qory bastamashy bolǵan bul joba áıelderge paıdaly daǵdylardy úırenýge, kásip bastaýǵa jáne ómirin túbegeıli ózgertýge kómektesýde. Joba aıasynda qanshama arý toqyma, aspazdyq, sándeý jáne basqa da túrli óner úırenip, óz isin ashyp jatyr.
Almatylyq Áıgerim Tólebaeva arnaıy kýrstan ótip, endi keńinen óz isin ashýdy oıǵa alyp júr eken. Ol aspazdyq kýrsyn oqyp qalyptastyrǵan daǵdylaryn qazir negizgi tabys kózine aınaldyryp otyr. Kýrs jóninde aıtyp bergen keıipkerimiz onlaın-formattaǵy sabaqtar yńǵaıly ekenin, óıtkeni belgili bir orynǵa baryp oqýdyń qajettigi bolmaı, ýaqyt únemdeletinin atap ótti. Tek ınternetke qoljetimdi sapaly kompıýteriń bolsa jetkilikti.
«Meniń múmkindigi shekteýli balam bolǵandyqtan, ony bireýmen uzaq ýaqytqa qaldyra almaımyn. Sondyqtan maǵan onlaın sabaq óte qolaıly boldy. Men óz qolymmen tátti taǵamdardy pisirýdiń ádis-tásilin jáne tıimdi satý jolyn úırený kerek dep oıladym. Maǵan kóbirek reseptter, et, kókónis, tátti pırogter, toqashtar úshin jaqsy qamyrdyń qupııalary týraly kóbirek bilý kerek boldy. Onyń ústine sabaq ta kóp ýaqyt alǵan joq. Sabaǵymyz aıaqtalǵanyna qaramastan, kýrs tyńdaýshylarynyń chatynda biz áli de sóılesip, ártúrli reseppen, paıdaly aqparatpen almasyp turamyz. Oqý bitkennen keıin tapsyrystar birden túse bastady. Qazir úıde otyryp, aqsha tabamyn. Búgingi tańda tapsyrystar aqyryndap kóbeıip keledi. Eger suranys artatyn bolsa, aspazdyq stýdııa ashamyn dep otyrmyn», dedi Áıgerim.
Osyndaı talaptanýshylardyń biri – Aqkól aýylynyń turǵyny Valentına Bosıakova. Ol úsh balany tárbıelep otyr, onyń bireýiniń múmkindigi shekteýli eken. О́mirlik qıyndyqtarǵa qaramastan, áıel shaǵyn sulýlyq salonyn ashty.
«Men bári ońaı bolady dep kútpegen edim. Sońǵy bes jyl ishinde manıkıýr, pedıkıýr, shýgarıngpen aınalysamyn. Shaǵyn salondy jalǵa aldym. Kirpik men qasty lamınattaý kýrstarynda oqyǵannan keıin klıenttik bazany arttyra aldym. Osy istegi bilimimdi jetildirip, bastamamdy jańa qyzmettermen tolyqtyra alǵanyma qýanyshtymyn», deıdi V.Bosıakova.
«О́mirlik qıyn jaǵdaıda júrgen balalary bar otbasylardy qoldaý jónindegi sharalar keshenin ázirleý jáne iske asyrý» jobasynyń úılestirýshisi Varvara Polıakovanyń aıtýynsha, sulýlyq, klınıng, digital-qyzmetter salasynda suranysqa ıe mamandyqtar boıynsha bilikti mamandar kýrstarynda 500-ge jýyq adam oqytyldy. Kýrs aıaqtalǵannan keıin barlyq qatysýshyǵa sertıfıkattar berildi. Bul olardy turaqty jalaqymen qamtamasyz etýge múmkindik beredi.
Sondaı-aq osy joba aıasynda biliktilikti arttyrý týraly sertıfıkattar otbasyn qoldaý ortalyqtarynyń qyzmetkerlerine de berildi. О́tken jyly daǵdarys ortalyqtarynyń 422 mamany qıyn ómirlik jaǵdaıdaǵy áıelder men balalarǵa psıhologııalyq jáne quqyqtyq kómek kórsetý boıynsha ózderiniń kásibı bilimin arttyrdy.
Áıelderdiń áleýetin kórsetýge mol múmkindik berip jatqan bul áleýmettik mańyzy bar joba granttyq qarjylandyrýdyń nátıjesinde Azamattyq bastamalardy qoldaý ortalyǵynyń jáne Aqparat jáne qoǵamdyq damý mınıstrliginiń qoldaýymen iske asyryldy.