Aqmola oblysynyń Sandyqtaý aýdanynda balabaqsha tárbıeshisiniń búldirshinge qatygezdik kórsetkeni týraly málimdemeden keıin qylmystyq is qozǵaldy. Oqıǵa qoǵamda rezonans týǵyzyp, bilim berý mekemesiniń birneshe qyzmetkeri tártiptik jazaǵa tartyldy, dep habarlaıdy Egemen.kz.
Sandyqtaý aýdanyndaǵy bóbekjaı-baqshalardyń birinde bolǵan jaǵdaı áleýmettik jelide jarııalanǵannan keıin kópshiliktiń nazaryn aýdardy. Balasynyń balabaqshada qorlyq kórgenin aıtqan ata-ananyń jazbasynan soń aýdandyq bilim bólimi tekseris júrgizgen.
Tekserý qorytyndysy boıynsha tárbıeshi qyzmetinen bosatyldy. Sonymen qatar, baqylaýdy tıisti deńgeıde uıymdastyrmaǵany úshin balabaqsha meńgerýshisine, shtattaǵy psıhologke jáne tárbıeshiniń kómekshisine qatań sógis berildi.
Atyraýda búldirshindi tepken tárbıeshi jumystan qýyldy
Istiń basty túıini – quqyq qorǵaý organdarynyń aralasýy boldy. Balaǵa qatygezdik kórsetý deregi boıynsha qylmystyq is qozǵalyp, sotqa deıingi tergeý bastalǵan.
Aqmola oblystyq polısııa departamenti tergeý amaldarynyń jalǵasyp jatqanyn málimdedi.
«Qazirgi ýaqytta kámeletke tolmaǵan balany tárbıeleý mindetterin tıisinshe oryndamaý faktisi boıynsha sotqa deıingi tergeý júrgizilip jatyr. Oqıǵanyń barlyq mán-jaıyn jan-jaqty ári obektıvti anyqtaýǵa baǵyttalǵan qajetti tergeý áreketteri júzege asyrylýda. Tergeý nátıjesi boıynsha Qazaqstan Respýblıkasynyń qoldanystaǵy zańnamasyna sáıkes prosessýaldyq sheshim qabyldanady», dedi Aqmola oblysy PD bóliminiń aǵa ınspektory Ásem Ábdirahmanova.
Rezonans týdyrǵan is oblystyq polısııa departamenti basshylyǵynyń jáne ýákiletti organdardyń erekshe baqylaýyna alynǵan. О́ńirlik bilim basqarmasy mundaı jaǵdaılardyń aldyn alý úshin aýdan aýmaǵyndaǵy barlyq mektepke deıingi mekemede qosymsha tekseris júrgiziletinin habarlady.
Sátbaevta balaǵa býllıng jasaǵan balabaqsha qyzmetkeri jumystan qýyldy