Avstrııada ushaq paraplanǵa soqtyǵysty. Parashıýt ushýǵa jaramsyz bolyp qalǵanymen, onymen qalyqtap kele jatqan áıel aman qaldy, dep habarlaıdy Egemen.kz.
Oqıǵa 23 mamyr kúni Sell-am-Ze qalasy mańynda bolǵan. Paraplanshy áıel asa aýyr jaraqat alǵan joq. Áleýmettik jelilerde taraǵan beınejazbada ushaqtyń paraplanǵa jaqyndap kelip, vınttiń matany jyrtyp jibergeni kórinedi.
Soqqydan keıin áıel tómen qaraı qulaı bastaǵan, biraq ol qosalqy parashıýtin ashyp úlgerip, orman jolyna qonǵan. Jerge túsken soń ol kameraǵa qarap: «Men áli tirimin, bul eń bastysy» degen.
Keıin ol birneshe jeri kógergenin jáne jeńil soqqylar alǵanyn aıtyp, bul kúndi «ekinshi týǵan kúnim» dep ataǵan.
Polısııanyń málimetinshe, Cessna ushaǵyn Tırolden kelgen 28 jastaǵy ushqysh basqarǵan. Ol sholý reısin oryndap júrgen jáne paraplannan qashyp úlgermegenin aıtqan. Tergeý aıaqtalǵannan keıin is Zalsbýrg prokýratýrasyna jiberiledi. Ushqyshqa qaýipsizdikke qater tóndirý baby boıynsha aıyp taǵylyp, úsh aıǵa deıin bas bostandyǵynan aıyrý jazasy qarastyrylýy múmkin.
Aqtaý mańyndaǵy ushaq apaty: Qaza tapqandardyń týystaryna ótemaqy tólendi