Almatyda ótken «Almaty Superski» jobasyna arnalǵan qoǵamdyq tyńdaýda qoǵam qaıratkeri Muhtar Taıjan taý shańǵysy kýrortynyń ekonomıkalyq jáne áleýmettik tıimdiligine toqtaldy. Onyń aıtýynsha, joba megapolıstiń týrızm salasyna serpin berip, myńdaǵan jańa jumys ornyn ashýǵa múmkindik beredi, dep habarlaıdy Egemen.kz.
Spıkerdiń sózinshe, jobaǵa salynatyn ınvestısııa ózin qysqa merzim ishinde aqtaı alady.
«Eger ınvestısııa kólemi shamamen 1 mıllıard eýro bolsa, bul joba 3-5 jyl ishinde ózin tolyq aqtaýy múmkin», dedi Muhtar Taıjan.
Ol sondaı-aq jobanyń áleýmettik mańyzyna erekshe nazar aýdardy. Qoǵam qaıratkeriniń pikirinshe, kýrort joǵary tabysty týrısterdi tartýǵa baǵyttalýy tıis.
«Men bul jobanyń Kýrshevelden de qymbat bolǵanyn qoldaımyn. Sonda munda aýqatty týrıst keledi. Bul – 20 myńǵa deıin jańa jumys orny degen sóz», dedi ol.
Aıda Balaeva: Almaty Superski taýdaǵy týrızmdi damytýdyń úlgisine aınalýǵa tıis
Muhtar Taıjan týrızmnen túsetin tabysty áleýmettik qoldaýǵa jumsaýǵa bolatynyn aıtty.
«Aýqatty týrısterden túsetin qarjy esebinen kópbalaly otbasylarǵa, ardagerlerge jáne múmkindigi shekteýli azamattarǵa sýbsıdııa berýge múmkindik týady», dedi spıker.
Sonymen qatar ol taý týrızmin damytý balalar sportyna da oń áser etetinin atap ótti.
«Bizdiń balalar Avstrııa men Shveısarııadaǵydaı shańǵy tebýdi tegin úırene alady», dedi Muhtar Taıjan.
Spıkerdiń bul sózderi zalda otyrǵan jurtshylyqtyń qyzý qoldaýyna ıe boldy.
Buǵan deıin Qazaqstanda týrızm salasy turaqty ósim kórsetip otyrǵany týraly habarlaǵanbyz.