Bıyldan bastap elimizdegi jyl boıy jumys isteıtin jáne maýsymdyq demalys ortalyqtarynyń qyzmeti lısenzııalaý arqyly retteledi. Osyǵan baılanysty Oqý-aǵartý mınıstrligi balalardyń qaýipsiz ári sapaly demalysyn qamtamasyz etýge baǵyttalǵan birqatar normatıvtik quqyqtyq aktini qaıta qarap, bekitti. Sonymen qatar jazǵy demalysty uıymdastyrý jumystaryna 120 myń pedagog-uıymdastyrýshy men 12 myńnan astam stýdent jáne volonter jumyldyrylady, dep jazady Egemen.kz.
Oqý-aǵartý mınıstri Juldyz Súleımenovanyń aıtýynsha, demalys ortalyqtarynyń qyzmetin júıeleý balalardyń qaýipsizdigin kúsheıtýge jáne kórsetiletin qyzmet sapasyn arttyrýǵa múmkindik beredi.
«Bıylǵy jyldan bastap jyl boıy jumys isteıtin jáne maýsymdyq demalys ortalyqtarynyń qyzmeti lısenzııalaý arqyly retteledi. Osyǵan oraı normatıvtik quqyqtyq aktilerdi sáıkestendirý jumystary júrgizilip, qaıta bekitildi», dedi mınıstr.
Mınıstrdiń aıtýynsha, lısenzııalaý talaptaryna sáıkes birneshe negizgi qujat jańartylǵan. Atap aıtqanda, «Bilim berý uıymdary túrleriniń nomenklatýrasyn bekitý týraly» №50 buıryq, «Memlekettik bilim berý uıymdarynyń úlgilik shtattaryn bekitý týraly» №224 buıryq, «Bilim berý uıymdarynyń úlgilik qaǵıdalaryn bekitý týraly» №385 buıryq qaıta bekitildi.
Sondaı-aq «Bilim berý uıymdarynyń bilim berý qyzmetine qoıylatyn biliktilik talaptaryn jáne olarǵa sáıkestikti rastaıtyn qujattardyń tizbesin bekitý týraly» №473 buıryq pen «Bilim berý uıymdarynyń bilim berý qyzmetimen aınalysýǵa lısenzııa berý» memlekettik qyzmetin kórsetý qaǵıdalaryn bekitý týraly» №483 buıryqqa ózgerister engizildi. Budan bólek, bilim berý-saýyqtyrý baǵdarlamalaryn ázirleý, kelisý jáne bekitý tártibin aıqyndaıtyn jańa qujat daıyndalǵan.
Sońǵy qońyraý: Elimizde 215 myńnan astam túlek mekteppen qoshtasty
Mınıstrlik demalys ortalyqtarynyń ashylý merzimine qaraı lısenzııalaý talaptaryn kezeń-kezeńimen engizý boıynsha túsindirý jumystaryn júrgizip jatyr. О́ńirlik shtabtar aıasynda ákimdikter men múddeli memlekettik organdar bilim berý-saýyqtyrý ortalyqtaryna ádistemelik qoldaý kórsetýde.
Juldyz Súleımenovanyń sózinshe, balalardyń jazǵy demalysyn uıymdastyrýǵa qatysty 2024-2026 jyldarǵa arnalǵan vedomstvoaralyq jospar aıasyndaǵy barlyq is-shara tolyq oryndalyp keledi.
«О́ńirlik shtabtardyń jumysy úılestirilgen. Bıyl alǵash ret «Bilim berý uıymdarynda balalardyń saýyqtyrylýy men demalysyn uıymdastyrý qaǵıdalary» bekitildi», dedi mınıstr.
№237 buıryqqa sáıkes jazǵy maýsym aldynda saýyqtyrý ortalyqtarynyń daıyndyǵyn qabyldaý jumysyna sanıtarııalyq-epıdemıologııalyq qyzmet, tótenshe jaǵdaılar organdary, polısııa, ákimdik, bilim basqarmalary men DOKSO ókilderi birlesip qatysady.
Astana mektepterindegi oryn tapshylyǵy máselesi qalaı sheshilmek?
Demalys oryndaryndaǵy mamandardyń sapalyq quramyna da erekshe nazar aýdarylǵan. Árbir qyzmetkerdiń sottylyǵy tekseriledi. Mınıstrdiń aıtýynsha, mamandardyń biliktiligin arttyrý úshin «Baldáýren» jáne «Bóbek» ortalyqtarynyń bazasynda arnaıy kýrstar men semınarlar uıymdastyrylǵan.
Jazǵy demalys kezeńinde balalardyń qaýipsizdigin kúsheıtý úshin keri baılanys jáne jedel kómek kórsetý tetikteri de jetildirildi.
«Bilim basqarmalary janyndaǵy koll-ortalyqtar azamattardyń suraqtary men ótinishterin qabyldaıdy. Sonymen qatar «111» baılanys ortalyǵy jazǵy kezeńde kúsheıtilgen rejımde jumys isteıdi», dedi Juldyz Súleımenova.
Barlyq bilim berý uıymdarynda balalardyń tikeleı kómek suraýyna arnalǵan QR-kodtar ornalastyrylǵan.
Eske salaıyq, bıyl túlekter sany sońǵy 25 jyldaǵy eń joǵary kórsetkishke jetti.