Báıge Qapshaǵaıǵa qarasty Qosqudyq aýylynda ótken. Atalmysh dodada eldiń túkpir-túkpirinen jınalǵan báıge jylqylar synǵa tústi, dep habarlaıdy Egemen.kz.
Naýryz meıramyn toılaý barysynda Sheńgeldi aýyldyq okrýgine qarasty Qosqudyq aýylynda «Alaman», «Top», «Taı», «Qunan» báıgeleri ótti.Jarys barysynda Qapshaǵaı óńiriniń ákimi Nurlan Orynbasaruly halyqty Áz-Naýryz merekesimen quttyqtady. Sondaı-aq, aýyl aqsaqaldary saıys bastalar aldynda atbelgilerge jyly lebizderin aıtyp, aq batasyn berdi.
«Bizde Jastar qoǵamy bar, solar báıge ótkizsek degen usynys jasady. Biz qoldap, syı-sııapat jaǵynan kómektestik. Sharadan túsken qarajatty Jastar qoǵamy qaıyrymdylyq qoryna aýdarsaq degen oılaryn aıtty, ol jaǵyn ózderi sheshe jatar. Degenmen, olar az qamtylǵan 1-2 otbasyna baspana salyp beremiz dep otyr, biz ony qoldaımyz, óz tarapymyzdan shamamyz kelgenshe kómektesemiz», dedi Nurlan Orynbasaruly.
Jalpy, respýblıkalyq deńgeıde ótken báıgege Almaty, Shyǵys Qazaqstan, Abaı, Jambyl, Qaraǵandy oblystarynan jáne Almaty, Taldyqorǵan qalalarynyń atbegileri qatysty.
25 shaqyrymdyq alamanǵa - 50, 15 shaqyrymdyq top báıgesine – 40 , al 8 shaqyrymdyq qunan báıgesine - 50, 4 shaqyrymdyq taı jarysyna – 30 sáıgúlik shabysqa jiberildi.
Jalpy, saıysta 100-den astam tulpar baq synasty. Nátıjesinde top báıgeden – Batys Qazaqstan oblysy, qunan báıgesinen - Eskeldi aýdany, taı báıgeden – Jambyl aýdany júldeli oryndarǵa ıe bolǵan. Al alaman báıgeden Qordaı aýdany bas júldeni jeńip alyp, tigilgen «Lada Granta» avtokóligin qanjyǵasyna baılady.