Tońy jibı qoımaǵan Tobyl óńiriniń turǵyndary da kúnniń sýyqtyǵyna qaramastan naqyshy ózgeshe Naýryzdy erekshe qýanyshpen qarsy aldy. Ulystyń uly kúnine oraı, Qostanaıdyń ortalyq alańynda aq shańqan úıler tigilip, merekelik konsert, sport saıystary, qolóner týyndylarynyń kórmeleri uıymdastyryldy.
Eki jyl boıy el ishin jaılap alǵan indettiń kesirinen kóktem merekesiniń qyzyǵyn kógildir ekrannan ǵana tamashalap kelgen turǵyndar bıyl Ulystyń uly kúnin ortalyq alańǵa shyǵyp el bolyp toılady.
Merekege jıylǵan jurt oblys ákimdigi ǵımaraty aldyndaǵy úlken sahnada óner kórsetken óńir ónerpazdarynyń konsertin tamashalady. «Naýryz toıym – mereke, salt-dástúrim – bereke» atty teatrlandyrylǵan qoıylym da, kózdiń jaýyn alatyn túrli etnografııalyq kórmeler de kópshilik kóńilinen shyqty.
Jergilikti etnomádenı birlestikterdiń atynan 10 shaqty aspaz qatysqan «Palaýlar álemi» atty baıqaýdy qyzyqtaǵan jurt kóp boldy. Baıqaý sharty boıynsha aspazdyń sheberligi palaýdyń tez pisýine, sondaı-aq taǵamnyń tábet oıatar hosh ıisi men dámdiligine qaraı baǵalandy.
«Eń úzdik otaý», «Baýyrsaqtar» baıqaýy sııaqty mádenı tanymdyq sharalar men sport saıystary da Naýryz toıynyń shyraıyn asha túskendeı. Qazaq kúresi, aýdaryspaq, jilik shaǵý, qoı kóterý, qol tires, asyq, jamby atý básekesi qyzdy. Jalpy bıylǵy Naýryzda ulttyq sport pen ulttyq oıyn túrlerin nasıhattaýǵa basa mán berildi.
Qostanaı oblysy