AQSh-tyń burynǵy Memlekettik hatshysy Madlen Olbraıt 84 jasynda dúnıeden ótti. Bul aqparatty Memlekettik departamenttiń baspasóz qyzmetiniń basshysy rastady, dep habarlaıdy Egemen.kz.
CNN málimetteri boıynsha, eks-Memlekettik hatshy qaterli isikten qaıtys bolǵan.
Olbraıttyń ólimi týraly aqparatty sársenbide ótken brıfıngte Memlekettik departamenttiń baspasóz qyzmetiniń jetekshisi Ned Praıs rastady. Onyń aıtýynsha, qazir Eýropaǵa bara jatqan AQSh Prezıdenti Djo Baıden eks-Memlekettik hatshynyń qaıtys bolǵany týraly habarlanǵan.
Olbraıttyń Twitter-degi paraqshasynda týystarynyń úndeýi de jarııalandy. Olar AQSh-tyń burynǵy Memlekettik hatshysy qaterli isikten qaıtys bolǵanyn rastady.
«Ol otbasy men dostarynyń ortasynda boldy. Búgin biz súıikti anamyzdy, ájemizdi, qaryndasymyzdy, tátemizdi jáne dosymyzdy joǵalttyq», delingen jazbada.
Olbraıt amerıkalyq syrtqy saıasat bóliminiń bastyǵy laýazymyna taǵaıyndalǵan alǵashqy áıel bolatyn.