Jastar kadrlyq rezervinen kútiletin úmit kóp

Is-sharany kirispe sózben ashqan Prezıdent Ákimshiligi Basshysynyń orynbasary Aıda Balaeva «Jastar kadrlyq rezervi» jastar saıa­saty úshin ǵana emes, memle­kettik saıasattaǵy róli de óte mańyzdy ekenin aıtty. Son­daı-aq bul bastamaǵa Mem­leket basshysy erekshe nazar salyp otyrǵanyn atap ótti.

«Taıaýda Prezıdentimiz ózi­niń kezekti Joldaýyn halyqqa jarııa etti. Onda keń aýqymdy, tereń saıası reformalar aıtyldy. Bul qoǵamymyzdy odan ári demokratııalandyra túsetin saıası reformalar jıyntyǵy. Endigi basty mindet – Prezıdent usynǵan saıası reformalardy qoǵam bolyp birigip sapaly júzege asyrý. Sonyń ishinde Prezıdenttik kadrlyq rezervine artylar senim, kútetin úmit te zor. Búgin ózderińizben talqylaıtyn taqyrybymyz da Memleket basshysynyń Joldaýyna arnalady. Sondyqtan Jastar kadrlyq rezervi músheleri – ózderińizdiń oılaryńyzdy tyńdaýdy jón kórip otyrmyz. Joldaýdy qalaı qabyl­dadyńyzdar? Saıası reformalardy qalaı júzege asyrý kerek dep esepteısizder? Jol­daýdy laıyqty júzege asyrýǵa sizderdiń de qatysý­laryńyz aıryqsha mańyzǵa ıe», dedi A.Balaeva.

«Sizderdiń árqaısyńyzdyń atqaryp júrgen jumys­tary­ńyz halyqtyń kóz aldynda. Qoǵam sizderge úlken úmit artyp otyr. Sondyqtan arnaıy irikteýden ótip, Prezı­denttiń jastar rezervi qura­myna qabyldanǵan soń bıik deńgeıden kórine bilý kerek. Sizderge qarap, halyq bolashaq el basqaratyn laıyqty býyn qalyptasyp jatqanyn uǵy­nýy kerek. Árıne, jumys jasalyp jatyr. Endi sony halyqqa kórsete bilý kerek. Keń kólemdi aqparat bere bilý qajet. Kezdesýde aıtylǵan usynystar, pikirlerdiń bári erteńgi kúni memlekettik organ­dardyń jumysyn jetildirýge óz septigin tıgizýi kerek. Mem­leketti basqarý júıesi jas­tar býyny sizder arqyly jandanady. Árqaısyńyzdy belsendi bolýǵa shaqyramyn», dedi A.Balaeva.

Budan keıin sóz kezegin alǵan Memlekettik qyzmet isteri jónindegi agenttik tóraǵasy Darhan Jazyqbaev Prezıdenttik jastar kadrlyq rezervi men agenttik jyl basynan beri belsendi jumysqa kirisip, qazirgi tańda birqatar jobany júzege asyryp jatqanyn atap ótti.  

«Jaqynda Jastar kadrlyq rezervin jetildirý boıynsha sharalar josparyn qaras­tyrdyq. Sonyń ishinde Pre­zı­denttik jastar kadrlyq rezervi keńsesi jobasy aıasynda kovorkıng ortalyqtyń qasynan aýqymdy keńse ashtyq. Sol jerde kezdesýler ótkizýdi bas­tap kettik. Buǵan deıin Rahym Oshaqbaevpen erkin formatta kezdesý uıymdastyrdyq.

Sondaı-aq rezerv múshe­lerin jumysqa ornalastyrý boıynsha mansaptyq ósýin baǵalaýyn qamtıtyn rekrýtıng algorıtmin ázirledik. Usy­nylǵan mehanızm boıynsha memlekettik organdar men kvazısektor sýbektileriniń bos laýazymdaryna ornalasý, rezerv músheleriniń mansaptyq tilekterine negizdelgen mansap kartasyn agenttik únemi jańartyp otyrady. Olardy memlekettik organdar men kvazısektor basshylaryna joldadyq. Qazirgi tańda rezerv múshelerimen jumys júrgizip jatyrmyz», dedi D.Jazyqbaev.

Spıkerdiń aıtýynsha agent­­tik memlekettik organdar jáne uıymdarmen kelisip, tıisti keste ázirlegen. Buǵan qatysty jumys Úkimet kanselıarııasymen kelisilgen. Soǵan sáıkes kvazımemlekettik kompanııalar men memlekettik organdardyń basshylarymen kezdesý uıymdastyrylady. Bul sáýir aıynda bastalady.

«Memleket basshysy 16 naýryzdaǵy Joldaýynda ota­nymyzdyń jarqyn bolashaǵy úshin tarıhı sheshimder sanalatyn birqatar bastama usyndy. Osyǵan baılanys­ty qoıylǵan jańa ári aýqymdy mindetterdi júzege asyrýǵa barynsha jumyla qatysamyz dep oılaımyn. Qarqyndy damý kezeńi jańa tásilderdi, utymdy she­shim­­derdi tez qabyldaýdy qa­jet etedi. Joldaýda bel­gi­­lengen negizgi mindetter bo­ıynsha Jastar kadrlyq rezer­vi óz usynystaryn ázirlep, atal­­ǵan kezdesýlerde olar jan-­jaqty talqylanyp, usy­nylady.

Qazirgi kezde jas urpaqtyń kóshbasshylary sizder. Sizder otanymyzǵa adal qyzmet etý jolynda barlyq kúsh-jiger­lerińiz ben bilimderińizdi jum­saısyzdar degen úmitimiz bar. Qalyptasqan jaǵdaıdy jańa kózqaraspen baǵalap, jańa ıdeıalar usynyp, eń bastysy Memlekettik apparatymyzdy jańa deńgeıge kóterip, qoǵamǵa úlgi bolady degen senimimiz zor», dedi D.Jazyqbaev.

Budan bólek, is-sharada Prezıdenttik jastar kadrlyq rezervi múshesi Aıdyn Baıe­dilov óz usynystarymen bó­listi. Onyń aıtýynsha, jas­tardy jarqyn bolashaqqa bastaıtyn bilim. Osy oraıda, keleshek qazirgi tańnan qamdanǵandarǵa arnalǵanyn atap ótti.

«Qazaqstanda barshasynyń sapaly bilim alýyna múm­kindigi joq ekenine keliser­sizder dep oılaımyn. Onyń deńgeıi adamnan adamǵa qaraı ózgerip otyrady. Bilimi bolý jetkiliksiz. Ony paıdalanyp, ıgilikke jaratý qajet. Memlekettiń aqyrǵy mindeti – barshaǵa birdeı múmkindik jasaý. Bul óte aýqymdy jumys. Osy oraıda, Prezıdenttik jastar kadrlyq rezervi osy masatqa qol jetkizýge atsalysady», dedi A.Baıedilov.

Jıyn barysynda Pre­zıdenttik jastar kadrlyq rezer­viniń músheleri ózderiniń oı-pikirimen bólisti. Máselen, Erbol Tólegenov Memleket basshysynyń Joldaýyna qatysty pikirimen bólisti. Onyń aıtýynsha, Joldaý kópshiliktiń kóńilinen shyqqan.

«Meniń aınalamdaǵy adamdardyń bárine Joldaý unady. Baǵyt durys – qoǵam­nyń saıası reformalarǵa sura­nysy bar, oǵan Prezıdent jaýap berdi. Árıne, adamdar odan da kóp nárseni qalaıtyny belgili. Biraq bári dáıekti túrde bolýy kerek. Bárinen buryn meniń esimde qalǵany mynaý. Biz «sýperprezıdenttik elden» sot, atqarýshy jáne zań shyǵarýshy bılik teńes­ti­riletin elge aınalamyz», dedi Erbol Tólegenov.

Ol Konstıtýsııalyq sot qurý bastamasyna toqtal­dy. Onyń aıtýynsha, Kons­tı­týsııalyq sot – demokratııalyq qoǵamda bolýǵa tıis óte mańyz­dy organ. Osy oraıda, spıker Konstıtýsııaǵa engiziletin ózgeristerge qoǵam múshelerin tartýdyń mańyzyn atap ótti.

Budan bólek, otyrys barysynda Jastar kadrlyq rezervi múshelerin tıimdi paıdalanyp, Qazaqstannyń damýyna úles qosýyna qatysty kóptegen usynys aıtyldy.