Eńbek resýrstaryn damytý ortalyǵynyń derekteri boıynsha bıyl aqpanda Elektrondyq eńbek bırjasynda (EEB) 72,3 myń bos jumys orny jáne 54,6 myń túıindeme ornalastyrylǵan. Osymen bos oryndar sany 5,9%-ǵa ósti, al jarııalanǵan túıindemeler sany qańtarmen salystyrǵanda 22,2%-ǵa tómendedi.
Qańtarda izdenýshiler ornalastyrǵan túıindemelerdiń sany bos oryndar sanynan 1,9 myńǵa asyp ketse, aqpan aıynda bos oryndar men jumys izdep júrgen adamdar arasyndaǵy alshaqtyq bos oryndar paıdasyna 17,7 myńdy qurady. О́tken aımen salystyrǵanda EEB-daǵy bos oryndar sany 4 myńǵa ósti, al túıindeme 15,6 myńǵa azaıdy.
Aqpanda óńirlik taldaý tek bes óńirde EEB-te bos oryndar sanynyń tómendegenin kórsetedi: Shymkent qalasynda (-37% nemese 1,3 myń bos jumys orynǵa), Jambyl oblysynda (-14% nemese 400 bos jumys orynǵa), Nur-Sultan qalasynda (-13,7% nemese 1,3 myń bos jumys orny), Qyzylorda (-12,3% nemese 200 bos jumys orynǵa) jáne Aqtóbe (-6,5% nemese 180 bos jumys orynǵa) oblystarynda. Suranystyń eń joǵary ósimi Mańǵystaý (+56,4% nemese 1 myń bos jumys orny), Pavlodar (+36% nemese 1,3 myń bos jumys orny) oblystarynda, Almaty qalasynda (+32,4% nemese 1,8 myń bos jumys orny) jáne Aqmola oblysynda (+23,4% nemese 500 bos jumys orny) baıqaldy.
Izdenýshiler tarapynan belsendiliktiń eń kóp tómendeýi Almaty qalasynda (-3,3 myń nemese -49,4%), Qyzylorda oblysynda (-3,3 myń nemese -47%), Jambyl oblysynda (-2,4 myń nemese -42%) jáne Shymkent qalasynda (-2 myń nemese -42%) baıqaldy.
«Bul rette biliktiligi jok eńbek resýrstaryna suranys qatty ózgeristerge ushyraǵan joq, al usynys ótken aımen salystyrǵanda 33%-ǵa qysqardy. Avtomobılder men avtobýstardyń júrgizýshilerine, býyp-túıýshilerge, tehnologııalyq qondyrǵylardy jóndeý jónindegi slesarlarǵa jáne tehnologııalyq jabdyqtardy montajdaýshylar sııaqty bilikti kadrlarǵa suranys arta tústi. Al ótken aımen salystyrǵanda bos jumys oryndary shet tili muǵalimderi, tas qalaýshylar, call-ortalyq operatorlary jáne qurylystaǵy elektrshiler úshin az ornalastyryldy», dedi ERDO basqarýshy dırektory Aleksandra Molchanovskaıa.
Aldyńǵy kezeńderdegideı, EEB-de bilikti qyzmetkerler arasynda kúzetshilerdiń (1 452 bos orynǵa qarsy 703 túıindeme), medbıkeler/meıirgerlerdiń (811 túıindeme jáne 1 554 bos oryn), tárbıeshilerdiń (705 túıindeme jáne 1 441 bos oryn) tapshylyǵy baıqaldy. Sonymen qatar zańgerler, áleýmettik qyzmetkerler, deneshynyqtyrý muǵalimderi arasynda artyqtyq baıqalady.
«Tapshy kadrlar boıynsha óńirlik teńgerimsizdikti de atap ótýge bolady. Máselen, kúzetshilerdiń eń kóp jetispeýshiligi Almaty jáne Nur-Sultan qalalarynda baıqaldy, al Mańǵystaý oblysynda kerisinshe kóp. О́ńirler boıynsha bólýdiń uqsas jaǵdaıy orta medısınalyq personal, sondaı-aq tárbıeshiler úshin de qalyptasýda. Alaıda Túrkistan oblysy men Shymkentte meıirgerlerdiń sany artyp, barlyq derlik oblystarda medbıkeler tapshylyǵy baıqalady», dedi A.Molchanovskaıa.
Aqpanda jumys berýshiler basshylyq laýazymdar úshin eń joǵary jalaqy usyndy. Osy kásibı top boıynsha aıyna 540 myń teńgeden bastalatyn usynyspen jumys tabýǵa bolady. Sondaı-aq ótken aıynda joǵary aqy tólenetin maman qatarynda jattyqtyrýshylardy (trenıngtermen, qaıta daıarlaýmen jáne biliktiligin arttyrýmen aınalysatyn) ataýǵa bolady. Olarǵa – aıyna orta eseppen 525 myń teńge, marksheıderlerge – 513 myń teńge, korporatıvtik mamandarǵa – 474 myń teńge, óndiristi daıyndaý ınjenerlerine 419 myń teńge usynyldy.