Ystanbulda Ýkraına men Reseı arasyndaǵy kelissózderdiń kezekti raýndy bastaldy. Jıynǵa Túrkııa Prezıdenti Redjep Taııp Erdoǵan da qatysty. Kezdesý barysynda atysty toqtatý, Reseı áskerin el aýmaǵynan shyǵarý sekildi máseleler talqylanýda. Al Ýkraınada urys áli de jalǵasyp jatyr.
Kezdesýdi ashqan R.Erdoǵan Ýkraınanyń da, Reseıdiń de Túrkııa úshin mańyzy zor ekenin aıta kelip, bul kelissózder eki memlekettiń basshysynyń kezdesýine jol ashatynyn jetkizdi. Túrkııa da joǵary deńgeıdegi kelissózder alańyn usynýǵa daıyn. Sondaı-aq R.Erdoǵan kelissózderden naqty nátıje shyǵaratyn kez kelgenine ekpin berdi.
Bul joly Ýkraına delegasııasynyń quramyna prezıdent keńsesi basshysynyń aımaqtyq saıasatqa jaýapty orynbasary Kırıll Tımoshenko qosylǵan eken. Reseı delegasııasyn prezıdenttiń kómekshisi Vladımır Medınskıı bastap keldi. Sondaı-aq kelissózge reseılik mıllıarder Roman Abramovıchtiń de kelgeni belgili boldy. Túrkııa telearnalary taratqan vıdeoda onyń prezıdent Redjep Taııp Erdoǵannyń baspasóz hatshysy Ibragım Kalınniń janynda otyrǵany kórsetilgen. Ýkraınadaǵy qaqtyǵys bastalǵaly R.Abramovıch Máskeý men Kıev arasynda araǵaıyndyq tanytyp, eki jaqty tatýlastyrýǵa talpynyp júr.
Úzilis kezinde Ýkraına prezıdenti apparaty basshysynyń keńesshisi Mıhaıl Podolıak qazirgi tańda birqatar mańyzdy másele boıynsha konsýltasııalar júrip jatqanyn jetkizdi. «Qazir birneshe mańyzdy másele boıynsha qarqyndy konsýltasııalar júrip jatyr. Eń bastysy – Ýkraınanyń halyqaralyq qaýipsizdigine kepildik berý týraly kelisim. Osy kelisim arqyly ǵana soǵysty Ýkraınaǵa qolaıly turǵyda aıaqtaı alamyz», dedi M.Podolıak. Onyń aıtýynsha, delegasııalar talqylap jatqan taǵy bir ózekti másele – atysty toqtatý. Osy arqyly barlyq qordalanǵan gýmanıtarlyq problemalardy sheshý. «Taǵy bir úlken másele – soǵystyń órshýi, óshpendiliktiń kúsheıýi, urys dalasynda ǵana emes, soǵys júrgizýdiń tártibi men erejelerin buzýdyń kúsheıýi», dedi ol.
Reseıdiń qorǵanys mınıstri Sergeı Shoıgý uzaq ýaqyttan keıin medıa alańǵa qaıta oralyp, Reseıdiń Ýkraınadaǵy basty mindeti oryndalǵanyn jetkizdi. Onyń aıtýynsha, endigi mindet – Donbass aımaǵyn «azat etý». «Operasııanyń birinshi kezeńiniń negizgi tapsyrmalary oryndaldy. Ýkraına Qarýly kúshteriniń jaýyngerlik áleýeti aıtarlyqtaı tómendedi. Osylaısha, endi basty nazarymyz ben kúsh-jigerimizdi basty maqsatqa – Donbasty azat etýge jumyldyrýǵa múmkindik aldyq», dedi S.Shoıgý.
Degenmen sarapshylar S.Shoıgýdyń sózi Kremldiń Ýkraınadaǵy sátsizdigin jýyp-shaıýǵa talpynysy dep esepteıdi. Iаǵnı bastapqy kózdegen maqsaty Kıevti tize búktirýge qol jetkize almaǵandyqtan, osyndaı shekteýli mindet qoıyp otyr. Bul sózdiń jany bar. Buqaralyq aqparat quraldarynda taraǵan málimetke súıensek, qazirgi tańda Reseı áskeri 17 myńnan astam jaýyngerinen aıyrylǵan. Bul qaza tapqandary ǵana. Jaralanǵandar budan da kóp.
Ulybrıtanııanyń qorǵanys mınıstrligi Ýkraınadaǵy jaǵdaı týraly ózderiniń sońǵy barlaý esebin jarııalady. Onda ýkraın kúshteri Kıevtiń syrtynda qarsy shabýyldarǵa shyǵyp, birqatar jerde Reseı áskerin tyqsyryp tastaǵanyn málimdedi. «Ýkraına kúshteri Kıevtiń soltústik-batysynda, sonyń ishinde Irpen, Býcha jáne Gostomelde qarsy shabýylǵa shyǵýdy jalǵastyrdy. Bul shabýyldar sátti aıaqtalyp, reseılikter birqatar pozısııadan artqa shegindi. Degenmen Reseıdiń bul baǵytta áli de soqqy berý múmkindigi bar. Reseı kúshteri Marıýpolge shabýylyn jalǵastyryp, qalany úzdiksiz atqylap jatyr. Biraq qala ortalyǵy áli de Ýkraınanyń baqylaýynda. Basqa jerlerde Reseı áskeri óz kúshterin qaıta toptastyryp, pozısııalaryn saqtap qalýǵa talpynyp jatyr», delingen baıandamada.
BBC arnasynyń habarlaýynsha, Reseıdiń 24 aqpanda basyp kirýinen beri 60-tan astam ýkraınalyq shirkeý men dinı ǵımarat qırap, 733 oqý orny zaqymdanǵan. Sondaı-aq osy ýaqytqa deıin barlyǵy 144 bala qaza taýyp, 220-dan astamy jaralanǵan.