Táýelsizdik jyldary Tobyl óńirindegi ulttyq ónerdiń órkendeýine úlken úles qosqan tulǵalardyń ishinde halyq aqyny Ásııa Berkenovanyń esimi erekshe atalady. Respýblıka deńgeıinde ótken talaı alaman aıtystarda top jaryp ısi qazaqtyń Ásııasy atanǵan aqyn aýyldan qalaǵa qonys aýdarǵannan keıin Ahmet Baıtursynuly atyndaǵy Qostanaı ýnıversıteti janynan «О́ner stýdııasyn» ashyp, boıynda talanty bar stýdent-jastardy ónerge baýlı bastady.
Bul ortalyq búginde jastar shyǵarmashylyǵyn shyńdaý mektebine aınalǵan. Stýdııada talapker aqyndarmen qatar, ózge de ónerli jastar tálim alady. Munda Bádrısapa atyndaǵy bı toby, vokal synyby, dombyrashylar ansambli jumys isteıdi. «О́ner stýdııasynan» 22 jyl ishinde talaı talantty jastar tárbıelenip shyqty. Olar qazir túrli salada eńbek etip júrgenimen aqyndyq, ánshilik, kúıshilik ónerden qol úzgen joq.
– Horeografııa, dombyra, vokal, aqyndyq jáne kórkemsóz sheberligi synyptaryn ashtym. Bara-bara óner stýdııasy ýnıversıtettiń kádimgideı mádenı-qoǵamdyq is-sharalaryn atqaratyn jáne boıynda talaby bar balalardyń qanatyn qataıtatyn, mádenıet salasyna úlesin qosatyn jaqsy bir ujym bolyp qalyptasty. Tipti, tehnıkalyq mamandyq boıynsha oqyǵan keıbir stýdentter meniń stýdııamdy bitirgen soń, birjola óner jolyna túsip ketti, – dedi halyq aqyny.
«О́ner stýdııasynan» qanattanǵan ónerpazdyń biri – óńirge aqyndyǵymen qosa ánshi-sazgerligimen tanymal bolǵan, búginde Ybyraı Altynsarın memorıaldyq murajaıyn basqaryp otyrǵan Marǵulan Ospanov. Mektep qabyrǵasynda júrip oblystyq aıtystarǵa qatysyp júrgen jas darynǵa únemi qazylar alqasynyń quramynda otyratyn halyq aqyny Sary domalaq dep at qoıypty. Keıin arman qýyp Qostanaıǵa kelip, Ahań ýnıversıtetine oqýǵa túsken sary domalaq bala Ásııa apaıynyń mektebinde ónerin ushtap, talaı aıtystarǵa qatysty. Birde jeńilip, birde jeńe júrip ysylyp, shyńdaldy. Búginde biraz týyndysy úlken sahnalarda oryndalyp júrgen sazger ustazynyń birneshe óleńine án jazyp, úlken konsertterde oryndap júr. Osylaısha, ustaz ben shákirt arasyndaǵy tárbıelik tálim shyǵarmashylyq áriptestikke ulasty.
– Ásııa apamyzdyń «Qaıdasyń balalyq» degen bir óleńi bar edi, sodan keıin «Jeńgelerim» degen óleńi bar. Ekeýi de ánge suranyp tur eken – dep, sol óleńderdi apaıdan arnaıy surap aldym. Soǵan án jazdym. Ol ánderdi ózimizdiń «О́ner stýdııasynyń» túlegi, búginde «Habar» telearnasynda qyzmet etip júrgen belgili jýrnalıst Darhan Ábdýahıttiń jary Dına oryndap júr, – dedi Marǵulan bul jaıynda.
Syrt qaraǵan kisige sýyqtaý kórinetin Ásııa Áıipqyzynyń ishki jan dúnıesine úńilip kórgen adam kerim bir jylylyq pen náziktikti, túzý adamǵa tán berik ustanymdy, elge janashyr azamattyqty birden ańǵarady. Aqynnyń bul qasıeti qaǵazǵa ádiptelgen jazba óleńderinde kózge uryp tur.
«...Tórelerdiń shyqsam da jıi esinen,
Tól ónerdiń kúsh alam ıesinen.
Tóbedegi qamshysyn úıirgende,
Tómendegi el qorǵaıdy kıesimen», –
dep Ásııa apamyzdyń eskerilmeı, elenbeı jatqan bir dúnıesi osy jazba óleńderi.
Ásııa Berkenovanyń aıtys ónerindegi ózindik órnegi men aqyndyq sheberligi jaıyndaǵy oıymyzdy belgili aqyn Jolbarys qajy Baıazıdtiń «Ásııanyń shyqqan bıigi, alǵan asýlary, aıtys ónerinde talaı jurtty tamsantyp, tańǵaldyrǵany meniń áli kúnge kóńil kókiregimde, kóz aldymda. Ásııa aıtys tarıhyn ejiktep, tom-tom kitaptardy aqtaryp, oqyp-úırenip, buryn-sońdy ótken aqyn-jyraýlardan sýsyndaǵan aqyn dep aıta almaımyn. Ásııanyń ózi ustaz. Qazaq mektebinde orys tilinen sabaq berdi. Joǵary dárejeli bilimi bar. Alǵash aıtysqa qosylǵannyń ózinde-aq tabıǵı talant ıesi, aıtys óneriniń bir bel balasy, sonyń besiginen shyqqan perzentindeı bolyp tanyldy. Sodan beri óziniń aıqyn úninen, óziniń bıiginen, dástúrli jyr maqamynan, aqyndyq-azamattyq tulǵasynan aınyǵan emes. Mine, men osyǵan qýanamyn», degen sózimen túıindesek qup.
Qostanaı oblysy