Bangladeshtegi turmystyq janjal kezinde qazaqstandyq azamat qaza tapty. Qazaqstannyń taǵy bir azamaty aýyr jaraqat alyp, aýrýhanada jatyr, dep habarlaıdy Egemen.kz Zakon.kz-ke silteme jasap.
«26 naýryzda Úndistandaǵy QR elshiliginiń konsýldyq bólimine Bangladesh aýmaǵynda bir kompanııa qyzmetkerleri arasynda turmystyq janjal týyndap, saldarynan Qazaqstan azamatynyń qaza tapqany týraly habarlama kelip tústi. Marqum pyshaq jaraqatynan kóz jumǵan», dep jazylǵan SIM-niń baspasóz qyzmeti taratqan habarlamada.
Vedomstvonyń habarlaýynsha, elshiliktiń konsýldyq bólimi atalǵan oqıǵaǵa qatysty tolyq aqparatty anyqtaý jáne máıitti Qazaqstanǵa jetkizýge kómektesý úshin kompanııa ókilderimen jáne marqumnyń týystarymen únemi baılanys ustap otyr.
«Oqys oqıǵa saldarynan taǵy bir qazaqstandyq pyshaqtan zardap shekken. Qazir ol Dakka qalasyndaǵy aýrýhanalardyń birinde em alyp jatyr», dep jazylǵan habarlamada.
Mınıstrliktiń málimetinshe, qazaqstandyqtar Bangladeshke Rýppýr qalasynda atom elektr stansııasyn salýmen aınalysatyn reseılik kompanııada jumys isteý úshin barǵan.