«Qazaqstannyń avıasııalyq ákimshiligi» AQ Dırektorlar keńesiniń sheshimimen Katalın Radý aksıonerlik qoǵamnyń bas dırektory bolyp taǵaıyndaldy, dep habarlaıdy Egemen.kz.
Katalın Radý - 25 jyldan astam tájirıbesi bar avıasııa salasynyń mamany.
Sońǵy 7 jyl ishinde ol ushý qaýipsizdigi men tıimdiligin arttyrý maqsatynda onyń damýyn úılestirýge jaýapty IKAO – halyqaralyq azamattyq avıasııa uıymy dırektorynyń orynbasary boldy.
2011 jyldan 2014 jylǵa deıin Radý Eýropalyq Azamattyq avıasııa konferensııasynyń prezıdenti boldy. Al 2007-2014 jyldary Rýmynııa azamattyq avıasııasynyń bas dırektory qyzmetin atqardy. Sondaı-aq eýropalyq azamattyq avıasııa konferensııasynyń (ECAC) prezıdenti, Eýropalyq aeronavıgasııa qaýipsizdigi uıymynyń (EUROCONTROL) vıse-prezıdenti, IKAO Assambleıasynyń 37-shi sessııasynyń vıse-prezıdenti jáne ECAC syrtqy baılanystar jáne qaýipsizdik máseleleri jónindegi úılestirýshisi laýazymdaryn atqardy.
Katalın Radý óziniń avıasııadaǵy mansabyn 1996 jyly Rýmynııa azamattyq avıasııa basqarmasynda ushýǵa jaramdylyq ınspektorynan bastaǵan.
Katalın Radý - Býharest polıtehnıkalyq ýnıversıtetiniń túlegi (aeroǵaryshtyq ınjenerııa fakýlteti, Aeronavtıka fakýlteti), Aeronavtıka jáne ǵarysh keńistigi joǵary ınstıtýtynyń magıstratýrasynda oqyǵan (Týlýza q., Fransııa), ǵylym doktory ǵylymı dárejesi bar. Ol sonymen qatar Garvard ýnıversıtetiniń strategııalyq basqarý salasyndaǵy jetekshi dıplomyn aldy.
Katalın Radý halyqaralyq mekemelerdegi basshylyq qyzmetterdegi mol tájirıbesiniń arqasynda álemdik avıasııa ındýstrııasyna joǵary deńgeıdegi jetekshi retinde tanymal. Katalın Radýdyń basshylyǵymen halyqaralyq avıasııadaǵy zamanaýı standarttar men reglamentter ázirlenip, engizildi.
«Qazaqstannyń avıasııalyq ákimshiligi» AQ 2019 jyly memlekettiń 100%-dyq qatysýymen quryldy. QR Úkimetiniń 2019 jylǵy 25 shildedegi № 530 qaýlysymen azamattyq avıasııa salasyndaǵy ýákiletti uıym bolyp aıqyndaldy. Negizgi qyzmeti – ushý qaýipsizdigi jáne avıasııalyq qaýipsizdik salasyndaǵy tehnıkalyq baqylaý jáne qadaǵalaý. AAK halyqaralyq aeronavıgasııalyq alymdar esebinen qarjylandyrylady.