Indýstrııa jáne ınfraqurylymdyq damý mınıstrliginde vıse-mınıstr Berik Kamalıev Sıngapýrdyń PSA International Pte Ltd kompanııasynyń vıse-prezıdenti Lı Pen Gımen kezdesti, dep habarlaıdy Egemen.kz.
Kezdesý barysynda kólik-logıstıka salasyndaǵy yntymaqtastyq perspektıvalary, onyń ishinde Aqtaý portynda konteınerlik hab qurý jobasy, kedendik jáne saýda úrdisterin sıfrlandyrý máseleleri talqylandy. Kompanııa ókilderi Transkaspıı halyqaralyq kólik baǵdarymen tasymaldardy odan ári damytýǵa qyzyǵýshylyq tanytty. Kezdesý qorytyndysynda taraptar tıisti jol kartasyn bekitýge kelisti.
Memleket basshysynyń tapsyrmasyna sáıkes IIDM Kólik komıteti Aqtaý portynda konteınerlik hab qurý boıynsha jumys júrgizýde. Joba «Qýatty óńirler – el damýynyń draıveri» ulttyq jobasyna engen. Konteınerlik hab qurý port arqyly ótetin konteıner aǵynyn 100 myń JFE deıin ulǵaıtýǵa múmkindik beredi.
Bıyl I toqsannyń qorytyndysynda Aqtaý jáne Quryq teńiz porttary arqyly konteınerlik tasymal kólemi ótken jyldyń sáıkes kezeńimen salystyrǵanda 4%-ǵa óskenin aıta ketý kerek.