Portýgalııanyń Maıa qalasynda Tennis Europe serııasy boıynsha jasóspirimder arasynda dástúrli halyqaralyq sýper týrnır máresine jetti, dep habarlaıdy Egemen.kz.
QTF baspasóz qyzmetiniń habarlaýynsha, elimizdiń jasóspirimder arasyndaǵy birinshi raketkasy, Eýropa reıtıngisiniń chempıondyq kestesinde kósh bastap kele jatqan Zańǵar Nurlanuly slovenııalyq Zıgo Sheshkomen birge juptyq synda germanııalyqtar Dıego Palomero – Nıls Makdonoldpen bas júldeni sarapqa saldy.
Úsh saǵatqa sozylǵan tartysty machta qazaqstandyq-slovenııalyq jup qarsylastaryna jol berdi – 6:1, 5:7, 5:10.
Almaty qalasynyń 13 jasar túlegi úshin bul juptyq syndaǵy altynshy fınaly edi, sonyń úsheýinde Zańǵar jeńiske jetti.
Sonymen qatar ol jekeleı synda bes ret chempıon atanǵan bolatyn.
Endi qazaqstandyq jas juldyz 18 sáýirde Úndistanǵa attanady. Zańǵar Nurlanuly jasóspirimder arasynda álem chempıonatynyń irikteý saıysynda el namysyn qorǵaıdy.