Abaı oblysynyń turǵyny memlekettik qyzmetter portaly arqyly júrgizýshi kýáligin aýystyrmaq bolǵan. Qujat rásimdeý barysynda óziniń psıhıatrııalyq esepte turǵanyn bilgen, dep habarlaıdy Egemen.kz.
Er adam bul aqparatpen kelispeı, sotqa júgindi. Ol aýrýhana men oblystyq densaýlyq saqtaý basqarmasyna qarsy talap-aryz berip, ózin esepke qoıýdy zańsyz dep tanýdy jáne derekterin psıhıkalyq aýrýlar ulttyq tirkeliminen alyp tastaýdy talap etti.
Isti qaraý barysynda aýrýhananyń ózi tekserý júrgizdi. Komıssııa er adamnyń esepke qatelikpen qoıylǵany týraly qorytyndyǵa kelgen. Anyqtalǵandaı, bul qajetti medısınalyq tekserýsiz jáne belgilengen tártipti buza otyryp jasalǵan.
Júrgizýshi kýáligin alý tártibi ózgeredi
Osydan keıin medısınalyq mekeme ýákiletti organǵa tirkelimdegi qate málimetterdi joıý týraly ótinish joldaǵan. Alaıda bul ótinish qaraýsyz qalǵan.
Aýrýhana ókiliniń aıtýynsha, er adamnyń ambýlatorııalyq kartasy saqtaý merziminiń aıaqtalýyna baılanysty joıylǵan. Biraq kartanyń joıylǵanyn rastaıtyn qujattar sotqa usynylmaǵan.
Densaýlyq saqtaý basqarmasyndaǵylar tirkelimnen málimetterdi joıý úshin er adam dárigerlik-konsýltasııalyq komıssııanyń tekserýinen ótýi kerek ekenin málimdegen.
Sot is materıaldaryn zerdelep, psıhıatrııalyq esepke qoıý zańsyz bolǵan degen qorytyndyǵa keldi. Sot jaýapkerler birneshe mańyzdy jaıtty dáleldeı almaǵanyn atap ótti: er adam psıhıatrııalyq kómekke júginbegen, tolyqqandy medısınalyq tekserý júrgizilgenine dálelder bolmaǵan, klınıkalyq baqylaýlar tirkelmegen, sondaı-aq mundaı kómekti kórsetýge er adamnyń nemese onyń zańdy ókilderiniń kelisimi usynylmaǵan.
Júrgizýshi kýáligin onlaın aýystyrý: Jańa qyzmetti qalaı rásimdeımiz?
Nátıjesinde Abaı oblysynyń mamandandyrylǵan aýdanaralyq ákimshilik soty talap qoıýshynyń paıdasyna sheshim shyǵardy. Talap-aryz qanaǵattandyrylyp, aýrýhana men densaýlyq saqtaý basqarmasyna er adam týraly málimetterdi psıhıkalyq aýrýlar ulttyq tirkeliminen alyp tastaý mindetteldi.
Aıta keteıik, Aqmola oblysyna qarasty Jibek joly aýylynda óz ata-anasyn, múgedektigi bar nemere aǵasyn jáne 18 jastaǵy qaryndasyn óltirdi dep kúdikke ilingen 42 jastaǵy azamattyń buǵan deıin psıhıkalyq esepte turǵany belgili boldy.