Talaıdy talantymen tánti etken dástúrli ánshi Tatıana Býrmıstrovanyń qazaq eline degen yqylasyn elemeý múmkin emes. О́zge ult ókili bola tura, qazaqtyń tilin keıbir óz tilin ógeısinip júrgen qaragózderimizden artyq bilip, artyq dáriptep júrgeni súısintedi.
Orys otbasynda dúnıege kelgen Tatıana Býrmıstrovanyń kásibı mýzykalyq bilimi joq. Ol boıyndaǵy bul ónerin táńirden berilgen úlken syı dep biledi. О́zine berilgen taýdaı talantty tarydaı shashyp almaı, jyldar boıy shyńdap, eńbektenip júrgeniniń arqasynda halyqtyń súıiktisi atanyp otyr.
«Jastaıymnan qazaqtyń án-kúıine, dombyraǵa ǵashyq boldym. Meni ónerge jetelep ákelgen de osy qushtarlyq. Áıtpese, osy kúnge deıin nota bilmeımin, ıaǵnı mýzykalyq saýatym joq. Meniń qazaq ánine degen erekshe yqylasyma ózimniń anam da tańǵalýshy edi. Otbasyda tórt qyzbyz. Anam da, ájem de án salatyn. Orys, ýkraın ánderin tyńdap óstim. Biraq maǵan qazaqtyń ánderi men termesi jaqyn edi. Bul maǵan qudaıdan berilgen syı shyǵar», deıdi Tatıana Býrmıstrova.
Onyń negizgi mamandyǵy dáriger ekeni kópke málim. Alaıda onyń júrek qalaýy ony ónerge qaıta-qaıta ákele bergen.
«Bir kezderi án salýdy toqtatyp, dáriger bolyp qyzmet etkenim bar. Sonda bir aqsaqal maǵan: «Sen adamdardyń tánin emes, ánińmen janyn emde» dep edi. Sonda halyqtyń meni dáriger emes, ánshi Tatıana retinde jaqsy kóretinin, izdeıtinin túsindim. Sodan bastap shyǵarmashylyǵymdy qaıta qolyma aldym», deıdi ánshi.
Sahnanyń kıesin jete uǵynǵan ol ár konsertine tyńǵylyqty daıyndalady. Tyńdarman aldyndaǵy jaýapkershilik ol úshin bárinen de bıik. Ánimdi tyńdaýǵa kelgen adam esti án tyńdap, ǵıbratty dúnıe ala alsa, meniń maqsatymnyń oryndalǵany deıdi ol.
Dástúrli ánshiniń sahnaǵa ulttyq kıimmen shyǵýy zańdy. Biraq Tatıana Býrmıstrova ulttyq kıimdi tek sahnalyq kıim dep sanamaıdy. Ol kúndelikti ómirde de ulttyq kıim kıip, qazaqtyń dástúrin ózgelerge dáriptep júredi.
«Zaman ózgerse de, meniń ulttyq kıimge degen mahabbatym ózgergen joq. Ár áıeldiń garderobynda eń bolmaǵanda bir ulttyq kıim bolýy kerek dep oılaımyn. Ulttyq kıim Naýryz merekesinde ǵana emes, ár kúni kıilip júrse, qandaı ádemi bolýshy edi», dedi T. Býrmıstrova.
Búginde onyń sýdaı qazaqshasyna ózge ult ókilderi qyzyǵa qaraıdy. Al Tatıana Býrmıstrova til úırengisi keletinderge kómek qolyn sozýdan aıanyp qalmaıdy.
Ánshiniń ónerdegi eńbegi eleýsiz qalǵan joq. Buǵan deıin ol «Parasat», III dárejeli «Barys» ordenderimen marapattalǵan, Qazaqstannyń eńbek sińirgen qaıratkeri ataǵyna ıe bolǵan. Kúni keshe mádenıet jáne óner qyzmetkerleriniń kásibı merekesi qarsańynda tól mádenıetimizdiń órisin keńeıtip, halqymyzdyń rýhanı dúnıetanymyn baıytý jolynda jemisti eńbek etip júrgeni úshin Memleket basshysynyń Jarlyǵymen eń joǵary «Otan» ordenimen marapattaldy.
«Memleket basshysynyń óner adamdaryn joǵary nagradalarmen marapattap jatqany qýantady. Umytylyp ketken, zeınetke shyqqan áriptesterimiz de umyt qalmaı, marapattalyp jatqanyna qýanyshtymyz. Eńbektiń elenip jatqany biz úshin asa mańyzdy. Men osy ýaqytqa deıin óz isimdi mahabbatpen jasap keldim. Jumysyńdy jaı qajettilik retinde emes, shyn yqylasyńmen jasaǵanda eńbegiń osylaı joǵary dárejede baǵalanady. Túrli jaǵdaılar boldy, otyz jyldaı múldem sahnaǵa shyqpaı, eleýsiz, eskerýsiz qalyp qoıǵan kezderim de boldy. Jalǵyz men emes, áli óz ýaqytyn kútip júrgen qanshama dástúrli ánshiler bar. «Otan» ordenin Otanyma adal qyzmet etip júrgenimniń belgisi dep bilemin», dedi Tatıana Býrmıstrova.
Marapattaý rásiminde Prezıdent ánshiniń jarty ǵasyrǵa jýyq ýaqyt boıy qazaqtyń dástúrli ónerin belsendi túrde keńinen dáriptep, jas daryndarǵa úlgi-ónege kórsetip júrgenin erekshe atap ótti.