«Egemen Qazaqstan» gazetinde ejelden qalyptasqan bir jaqsy úrdis bar. Ol redaksııada isteıtin qyzmetkerlerdiń memlekettik mekemelerge, ózge basylymdarǵa basshy bolyp aýysyp jatatyny. Sondaı bir janyńdy jadyratar súıinshi habar qasıetti Áýlıeata óńirinen jetip otyr.
Bas basylymnyń Jambyl oblysyndaǵy tilshisi Kósemáli Sáttibaıuly óńir aınasy sanalatyn «Aq jol» gazetine bas redaktor bolyp bekitilipti. Qalamy júırik, oıy ushqyr, alǵan taqyrybyn jan-jaqty zerttep, zerdeden ótkizip, tereńinen qaınap shyqqan bastaý sýyndaı móldiretip jazatyn áriptesimizdiń bul ósý baspaldaǵyna egemenqazaqstandyqtar úlken iltıpat tanytýda.
Kósemáli Sáttibaıuly – qarymdy jýrnalıst qana emes, talantty jazýshy, ondaǵan kitaptardyń avtory. Ol – qalamgerler arasynda bedeli bıik, aýzy dýaly, sózi ýáli azamat. Ár jaqsy isti qýanyshpen qabyldap, sáttilik tilep otyrýdy úrdiske aınaldyrǵan bas basylym jýrnalısteri áriptesiniń jańa qyzmetine tabys tilep, barǵan ujymynyń uıytqysy, jurttyń syılysy bolsyn degen júrekjardy shyn tilekterin bildiredi.
Egemenqazaqstandyqtar.