О́mirde túrli qyzyqtar bar. О́kinishke qaraı keıde jurtshylyqty tańdandyrar emes, jaǵa ustatatyndary da kezdesedi. Atyraýda Uly Otan soǵysynyń ardageri Aleksandr Pogodaev budan on jyl buryn óliler tizimine engizilipti. Qalaı? Ne úshin? Bul saýaldarǵa ázirge jaýap joq. Ardagerdiń nemeresi Olga Sbıtnevanyń aıtýynsha, soǵys ardageri tiriler sanatynan shyǵarylyp tastalǵan.
– Bizge bul halyqqa qyzmet kórsetý ortalyǵyna júgingen kezimizde belgili boldy. Kýálikke belgi salyp, ortalyqta bizge qyzmet kórsetken qyz mundaı anyqtama ala almaıtynymyzdy aıtty. О́ıtkeni, Aleksandr Ivanovıch Pogodaev málimetter bazasynda 2001 jyldan qaıtys bolǵandar sanatynda bolyp shyqty, – deıdi ardagerdiń nemeresi Olga Sbıtneva.
Uly Otan soǵysynyń ardageri, ishki ister qyzmetiniń otstavkadaǵy polkovnıgi, sonymen birge, «Frontovıchka» eńbek ardagerleri horynyń beldi múshesi sanalatyn Aleksandr Pogodaev ázirge óliler sanatynda ekenin áli bilmeıdi. Sebebi, ol 2004 jyly jańa jeke kýálik, sheteldik tólqujat alypty. Tipti 2013 jyly jańa páterge ıe bolǵan.
– Tiriler tiziminde joq adamǵa qalaısha jańa qujattar berilgen? – degen tańdanysyn jasyrmaıdy ardagerdiń nemeresi O.Sbıtneva. Bir qyzyǵy óliler sanatyna engizilgen soǵys ardageri A.Pogodaev jaqyn arada 90 jasqa tolǵaly otyr.
Joldasbek ShО́PEǴUL,
«Egemen Qazaqstan».
Atyraý oblysy.