«Dostyq» ordeni – IýNESKO-nyń bas dırektoryna

Jaqynda IýNESKO-nyń Parıj qalasyndaǵy shtab-páterinde osy Uıymnyń Bas dırektory Irına Bokovaǵa «Dostyq» ordenin tapsyrý saltanaty boldy. Qazaqstan Respýblıkasynyń IýNESKO jáne ISESKO isteri jónindegi Ulttyq komıssııasynyń tóraǵasy Imanǵalı Tasmaǵambetov Qazaqstan Respýblıkasy Pre­zı­dentiniń atynan joǵary mem­lekettik nagradany tapsyra otyryp, Irına Bokovanyń bilim, ǵylym jáne mádenıet salalarynda Qazaqstan men IýNESKO-nyń yntymaqtastyǵyn nyǵaıtý men keńeıtý jumystaryndaǵy eńbegin atap ótti. 2013 jylǵy tamyzda Astana qalasynda Bas dırektordyń qaty­­sýymen tanystyrý rásimi ótki­zilgen Qazaqstan bastamasymen qolǵa alynǵan iri joba – Mádenıetter jaqyndastyǵynyń halyqaralyq onjyldyǵyn (2013 – 2022 jj.) qoldaǵany úshin alǵys bildirildi. Qazaqstan nagradasyn qabyl­daı otyryp, IýNESKO-nyń Bas dırektory Elbasy Nursultan Nazarbaevqa kórsetilgen senimi úshin alǵys bildirip, ózi úshin «beıbitshilik, dostyq jáne ynty­maqtastyq degen úsh sózdi beıneleıtin «Dostyq» ordenin alý úlken mártebe» ekenin atap ótti. Onyń pikirinshe, atalǵan sóz­der, sonymen qatar, IýNESKO mıssııalarynyń mánin bildiredi. Irına Bokova: «Men bul nagradany, bizdiń ortaq qun­dy­lyqtarymyz ben berik beıbit­shi­lik pen ornyqty damýdy qalyp­tastyrýdaǵy birlesken kúsh-jigerimizge adaldyǵymyzdyń sımvoly retinde IýNESKO-ǵa kór­setilgen senim dep qabyl­daı­myn», dep atap ótti. IýNESKO Basshysynyń aıtýynsha, 2012 jylǵy mamyrda Álemdik jáne dástúrli din­der kóshbasshylarynyń IV sezine qatysý úshin, sondaı-aq, 2013 jylǵy tamyzda Halyq­ara­lyq onjyldyqty ashý úshin Qazaqstanǵa sapary bary­syn­da Prezıdent Nursultan Nazar­baevtyń basshylyǵymen Qazaq­standa istelip jatqan kóptegen ońdy isterdiń kýágeri bolǵan. Nagrada tapsyrý rásimine Tótenshe jáne ýákiletti elshi, Qazaqstannyń IýNESKO janyn­daǵy Turaqty ókili Nurlan Dánenov, shetelderdiń Turaqty ókilderi, IýNESKO-nyń Erikti izgi nıet elshileri men álem ártisteri qatysty. «Egemen-aqparat».