Darhan Ahmedıev qorǵanys mınıstriniń orynbasary laýazymyna taǵaıyndaldy, dep habarlaıdy Egemen.kz Aqorda saıtyna silteme jasap.
«Darhan Meıramuly Ahmedıev Qazaqstan Respýblıkasy qorǵanys mınıstriniń orynbasary laýazymyna taǵaıyndaldy», delingen jarlyqta.
Darhan Ahmedıev Qaraǵandy memlekettik tehnıkalyq ýnıversıtetiniń túlegi, «Bolashaq» stıpendııasynyń ıegeri (King's London college).
Eńbek jolyn 2012 jyly «Ulttyq aqparattyq tehnologııalar» AQ taldaýshysy retinde bastaǵan. 2013-2015 jyldary QR Tótenshe jaǵdaılar mınıstrliginde jáne QR IIM Tótenshe jaǵdaılar komıtetinde sarapshy bolyp jumys istegen. Keıinnen QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń bas sarapshysy laýazymyna qabyldandy.2017 jyldan bastap 2019 jylǵa deıin QR Qorǵanys jáne aeroǵarysh ónerkásibi mınıstrliginiń basqarma basshysy bolyp jumys istegen.
2019 jyly QR sıfrlyq damý, ınnovasııalar jáne aeroǵarysh ónerkásibi mınıstrliginiń elektrondyq ónerkásipti damytý departamenti dırektorynyń orynbasary boldy.
2020 jyly QR sıfrlyq damý, ınnovasııalar jáne aeroǵarysh ónerkásibi mınıstrliginiń IT damý departamentiniń dırektory bolyp taǵaıyndalǵan.
Ári qaraı, vedomstvonyń ishki qaıta uıymdastyrý nátıjesinde 2020 jylǵy 20 qarashadan bastap QR sıfrlyq damý, ınnovasııalar jáne aeroǵarysh ónerkásibi mınıstrliginiń aqparattyq jáne aqparattyq-kommýnıkasııalyq tehnologııalardy damytý departamentiniń dırektory bolyp taǵaıyndalǵan.