Búgin Premer-Mınıstrdiń orynbasary Eraly Toǵjanovtyń tóraǵalyǵymen Muhtar Áýezovtiń 125 jyldyq mereıtoıyn atap ótýge daıyndyq jónindegi jumys tobynyń otyrysy ótti. Jıynǵa memlekettik organ ókilderi men óńir ákimderi, Qazaqstan jazýshylar odaǵy men Muhtar Áýezov atyndaǵy Ádebıet jáne óner ınstıtýtynyń basshylyǵy, tanymal tarıhshylar men ádebıettanýshylar qatysty, dep habarlaıdy Egemen.kz.
Qazaqtyń zańǵar jazýshysynyń mereıtoıyn atap ótý jónindegi jalpy respýblıkalyq josparǵa sáıkes bıyl 4 baǵyt boıynsha 82 is-shara uıymdastyrylady.
Onyń ishinde Muhtar Áýezovtiń ádebı-memorıaldyq mýzeıi ǵımaratyna ǵylymı-restavrasııalaý jumystary júrgizilip, Sholpan-Atada jazýshynyń bıýsti ornatylady.
Mektep oqýshylaryna arnalǵan «Áýezovtaný» beınedárister sıkly ázirlenip, ádebı podkasttar jasalady. Halyqaralyq teatr festıvali ótkizilip, «Aqan-Zaıra» tragedııasy alǵash ret sahnalanady. Sondaı-aq «Qıly zaman» povesi boıynsha telehıkaıa túsiriledi.
Mádenı is-sharalar aıasynda shetel muraǵattarynda Muhtar Áýezovke qatysty qujattar zerdelenip, tyń materıaldardy izdestirý qarastyrylǵan. Odan bólek óńirlik deńgeıde jospardan tys 500-den asa merekelik shara ótkizý josparlanyp otyr. Osyǵan baılanysty Eraly Toǵjanov jazýshynyń mereıtoıyn atap ótýge barlyq óńir atsalysýy qajettigin atap ótti.
Keńes barysynda ádebıettanýshylar men jazýshylar tarapynan mereıtoıdy atap ótýge qatysty birqatar usynys aıtyldy.
Vıse-premer qoǵamdyq mańyzy bar mádenı-buqaralyq, aqparattyq-ımıdjdik, ǵylymı zertteý, aǵartýshylyq is-sharalardyń joǵary deńgeıde oryndalýy úshin birqatar tapsyrma berdi. Atap aıtqanda, Mádenıet jáne sport mınıstriligine jospar men mereıtoı logotıpin barlyq memlekettik organǵa ýaqytyly joldaýdy jáne onyń iske asyrylýy týraly eseptik aqparatty Úkimetke toqsan saıyn engizýdi tapsyrdy. Sonymen qatar múddeli memlekettik organdar men uıymdarǵa jospardyń sapaly oryndalýyn qamtamasyz etý qajettigin eskertti.