Bıyl «Bolashaq» baǵdarlamasyna 40 jańa mamandyq engizildi, dep habarlaıdy Egemen.kz.
«Bıyl eńbek naryǵynyń trendterin taldaýdyń nátıjesinde «Bolashaq» baǵdarlamasynyń basym mamandyqtar tizimine 40 jańa mamandyq qosyldy. Olar ınnovasııa, jańa tehnologııa, medısına jáne ındýstrııalyq ınjenerııa, jaratylystaný ǵylymdarymen baılanysty. Osy rette 17 mamandyqtyń ataýy keńeıtilip, burynnan bar mamandyqtar qataryna qosyldy, al 23-i jańa mamandyq retinde engizildi», dep jazdy Ánýar Janǵozın Facebook-tegi paraqshasynda.
Onyń aıtýynsha, tehnıkalyq baǵyttaǵy mamandyqtar 30%-ǵa keńeıtilgen.
«Halyqaralyq baǵdarlamalar ortalyǵy basym mamandyqtardy anyqtaý úshin joǵary jáne joǵary oqý ornynan keıingi bilimi bar kadrlarǵa qajettiligi týraly memlekettik organdar men uıymdardan kelip túsken 70-ke jýyq ótinimge taldaý jasady. Kadrlyq naryqtyń orta merzimdi boljamyn eskerdi. Memlekettik organdar, JOO, ǵylymı ortalyqtar, ındýstrııa jáne bıznes ókilderiniń qatysýymen saraptamalyq kezdesýler ótkizildi», dedi ortalyqtyń basqarma tóraǵasy.
Ánýar Janǵozın 2022 jyly sheteldik ýnıversıtetterde bilim alýǵa arnalǵan basym mamandyqtar tizimine jalpy akademııalyq oqýǵa arnalǵan 92 mamandyq jáne taǵylymdamadan ótýge arnalǵan 158 mamandyq kirgenin atap ótti.
Tizimdi halyqaralyq baǵdarlamalar ortalyǵynyń resmı saıtynan qaraýǵa bolady.
Aıana Toǵanbek