Almatyda Dinmuhamed Qonaevtyń murajaı-úıiniń ashylý rásimi ótti, dep habarlaıdy Egemen.kz Almaty qalasynyń ákimdigine silteme jasap.
Kórnekti memleket qaıratkeriniń 110 jyldyǵyn merekeleý aıasynda murajaı qalpyna keltirilip, murajaı-úı bolyp qaıta ashyldy.
Murajaıdyń ashylý rásimine qala ákimi Erbolat Dosaev, D.A.Qonaevtyń Halyqaralyq qoǵamdyq qorynyń tóraǵasy Eldar Qonaev, D.A.Qonaevtyń jıeni Dıar Qonaev, onyń jeke dárigeri Ahat Mýlıýkov, dosy ári seriktesi Aleksandr Goıkolov qatysty.
Restavrasııa jáne ekspozısııa prosesine murajaı jáne muraǵat isi salasyndaǵy jetekshi mamandar, dızaınerler, músinshiler, sýretshiler, beıneınjenerler jáne basqalary tartyldy. Jumys barysynda Qonaevtyń Halyqaralyq qorymen kelisilgen tujyrymdama men jobanyń eskızi ázirlendi.
Reekspozısııa taqyrybynyń negizine saıasatkerdiń el ómirindegi mańyzdy tarıhı oqıǵalarǵa degen jeke kózqarasyn sýretteıtin «Stalınnen Gorbachevke deıin» avtobıografııalyq kitaby arqaý boldy.
Murajaıda hronologııalyq tártipte ornalastyrylǵan muraǵattyq qujattar, fotosýretter men eksponattar Dinmuhammed Qonaevtyń kórnekti qoǵamdyq-saıası qaıratker retindegi alyp tulǵasyn beıneleıdi.
Aıta ketsek, barlyq eksponattar, sonyń ishinde Dinmuhamed Qonaevtyń jeke zattary burynǵy qalpynda saqtaldy.
Murajaı zamanaýı sandyq jáne mýltımedııalyq tehnologııalarmen jabdyqtaldy, endi saıasatkerdiń ómiri men qyzmetine qyzyqqan kelýshiler aýdıo nusqaýlyqtardy qoldana alady.
Eske sala ketsek, murajaı 2002 jyly Qonaevtyń 90 jyldyǵyna oraı ashylǵan edi. Búginde murajaı qorynda 8 196 eksponat bar.