Keles aýdany, Lesbek batyr eldi mekeniniń turǵyny Abzal Jasuzaq aýyl sharýashylyǵyna kómektesetin tehnıka qurastyryp shyǵardy.
Ol bul tehnıkany jasaýǵa alty aı ýaqyt jumsaǵan. Júk tasýǵa, qora tazalaýǵa, taǵy basqa jumystarǵa óte qolaıly shaǵyn tehnıka mal sharýashylyǵymen aınalysatyndarǵa taptyrmas qural bolǵaly tur.
Tehnıkaǵa áýes Abzal Jasuzaq mektepti bitirgen soń aýdan ortalyǵy Abaı aýylyndaǵy №13 kásiptik kolledjinde bilim alǵan. Buǵan deıin de 33 jastaǵy áýesqoı maman mal sharýashylyǵyna yńǵaıly birneshe qurylǵy jasap, olardy kádege jarata bilgen. Jaqynda jasap shyqqan bul tehnıkasyn sheber «SherAz» markasymen tańbalapty, onysy «Sheber Abzal» degendi bildiredi eken. Mal sharýashylyǵymen aınalysatyn ónertapqysh aýyl turǵyndaryna paıdasy mol tehnıkalar shyǵarý baǵytynda izdenis aıasyn keńeıte túsýdi maqsat etip otyr.