L. Gýmılev atyndaǵy Eýrazııa ulttyq ýnıversıtetiniń University Sports Centre sport kesheninde BAQ ókilderi arasynda fýtzaldan eki kúndik «MIIR PRESS CUP» týrnıriniń ashylý saltanaty bolyp ótti. Is-sharaǵa QR IIDM apparat basshysy Erbolat Muqaev, vedomstvonyń baspasóz hatshysy Janjigit Omarhan jáne L.Gýmılev atyndaǵy EUÝ áleýmettik-mádenı damý jónindegi prorektory Dıhan Qamzabekuly qatysty, dep habarlaıdy Egemen.kz.
Indýstrııa jáne ınfraqurylymdyq damý mınıstrligi uıymdastyrǵan týrnır qazaqstandyq BAQ ókilderiniń basyn biriktirip, jýrnalıster men redaksııalardyń shyǵarmashylyq ujymdary arasyndaǵy yntymaqtastyqty nyǵaıtý maqsatynda ótkiziledi.
Týrnırge Qazaqstannyń ár óńirinen 18 komanda qatysýǵa nıet bildirdi. Jerebe qorytyndysy boıynsha olar 4 topqa bólinip, ár toptaǵy eki myqty komanda pleı-offqa joldama alady. Týrnır 23 sáýirde aıaqtalady dep josparlanýda. Barlyq oıyndar «University Sports Centre» kesheninde ótedi.
BAQ liga jýrnalıster lıgasy — BAQ komandalary arasynda mını-fýtboldan toǵyz maýsym kóleminde jáne voleıboldan chempıonat ótkizgen, BAQ ujymdaryna arnalǵan kezdesý alańy. Jalpy BAQ liga ótkizgen jarystardyń barlyq maýsymyna elimizdegi 70-ke jýyq BAQ-tan 700-den astam jýrnalıst qatysty. Týrnır seriktesteri — Qazaq geophysics jáne Kazakhmys barlau kompanııalary.
«University Sports Centre» — bul aýdany 7 myń sharshy metrden asatyn, voleıbol, basketbol, shaǵyn fýtbol, gandbol, kúres sııaqty sport túrleri boıynsha jattyǵý sabaqtaryn ótkizýge, sondaı-aq arnaıy sport seksııalary boıynsha jarystarǵa arnalǵan zamanaýı keshen. Sport kesheni 2021 jyldyń 25 mamyrynda L. Gýmılev atyndaǵy EUÝ-niń 25 jyldyǵyn merekeleý aıasynda ashyldy.