27 sáýir kúni Nur-Sultan qalasy ákimdiginiń «Astana jastary» KMM elordalyq JOO túlekteri men jumyssyz jastar úshin bos oryndar jármeńkesin ótkizedi, dep habarlaıdy Egemen.kz.
Bos oryndar jármeńkesiniń negizgi maqsaty jumys berýshi men jumys izdeýshi arasyndaǵy tikeleı baılanys arqyly jumyssyz azamattardy, bilim berý uıymdarynyń túlekteri men jastardy jumysqa ornalastyrýǵa járdemdesý bolyp tabylady.
Bos oryndar jármeńkesine qalanyń 30-dan astam jumys berýshileri qatysady, olar óz bos oryndaryn usynady. Bul elorda jastary úshin ózderi qalaǵan saladaǵy bos jumys oryndaryn zerdeleýge jáne birneshe jumys berýshilermen bir jerde tikeleı sóılesýge tamasha múmkindik.
Bos oryndar jármeńkesi kompanııalar úshin de, izdenýshiler úshin de óteýsiz negizde ótkiziledi.
Bos oryndar jármeńkesinde halyqty jumyspen qamtý máseleleri «Bastaý Bıznes» baǵdarlamasy, memlekettik granttar boıynsha halyqqa keńes berý uıymdastyrylady.
Mundaı is-sharalarǵa qatysý óziniń mansaptyq jolyn bastaǵan jas býyn úshin mańyzdy, óıtkeni ol qyzmettiń eń qyzyqty salalaryn jáne qyzmetker retinde óziniń «qunyn» anyqtaýǵa kómektesedi.