Qazaqstan musylmandary dinı basqarmasy BAQ-ta jarııalanyp jatqan «Ánýarbek Jeksenǵalıevtiń bir jyldary «Zeket» qory Astana qalasy ókildiginiń dırektory bolǵan» degen aqparatqa qatysty málimdeme jasady, dep habarlaıdy Egemen.kz.
Málimdemeni Qazaqstan musylmandary dinı basqarmasynyń baspasóz hatshysy Aǵabek Qońarbaıuly óziniń Facebook-tegi paraqshasynda jarııalady.
Ol Dinı basqarmanyń áriptesterimizden tek resmı aqparatqa júginýdi suraıtynyn, jýrnalıstiń ádeıi taratqan materıaly kóptiń oıyna kúmándi oı salǵanyn aıtyp, «Ánýarbek Jeksenǵalıev bir jyldary «Zeket» qory Astana qalasy ókildiginiń dırektory bolǵan» degen málimettiń qaıdan shyqqany jáne ony qaıdan alǵany basqarmaǵa belgisiz ekenin aıtty.
Osyǵan baılanysty ol Qazaqstan musylmandary dinı basqarmasynyń Ánýarbek Jeksenǵalıevke qatysty málimdemesin jarııalady.
«Ánýarbek Jeksenǵalıev 2016, 2017 jyldary, ıaǵnı 1 jyl kóleminde «Zeket» qorynyń janyndaǵy qaıyrymdy kásipkerlerden quralǵan Qamqorshylar keńesiniń Astana qalasy boıynsha múshesi boldy. Erikti túrde qoǵamdyq negizde qordyń izgi is-sharalaryna úles qosty.
Ánýarbek Jeksenǵalıevtiń eshqandaı zańdy ókilettigi bolǵan joq. Ol QMDB janyndaǵy «Zeket» qorynyń dırektory bolǵan emes! Ol 2017 jyly negizgi jumysynda, ıaǵnı kásipkerlik qyzmetinde qaldy», dedi ol.
Sondaı-aq Dinı basqarmanyń ókili Ánýarbek Jeksenǵalıevtiń bıýdjet qarjysyna qatysty kúdikke ilinýin «Zeket» qorynyń aqshasyn «jymqyrýmen» baılanystyryp jatqanyn, bıýdjet qarjysy men qordyń esebindegi qarajattyń maqsaty men baǵyty múldem bólek eki nárse ekenin atap ótti.
«Zeket» qoryna memlekettik bıýdjetten qarjy bólinbeıdi. Osy máseleni, atap aıtqanda, aqparattyń mazmunyn basqa arnaǵa burý kásibı jýrnalısterge tán emes áreket dep sanaımyz.
Qarjylyq monıtorıng agenttigi kásipker Ánýarbek Bolatuly Jeksenǵalıevke qandaı negizde izdeý jarııalaǵany týraly bizde resmı málimet joq», dep jazdy ol.