Elimizde júrgizýshi kýáligin berý úshin kýrsanttardy oqytyp, úıretetin avtomektepterdiń qyzmetine júkteletin mindetter arta túspek. Bul týraly «Azamattarǵa arnalǵan úkimet» memlekettik korporasııasynyń basqarma tóraǵasy Súıenish Ábdildın málim etti, dep habarlaıdy Egemen.kz.
«Júrgizýshi kýáligin berý prosesin qatańdatý sharasy mamandandyrylǵan HQO-nyń jumysyna tikeleı áser etedi. Oǵan dálel - jýyrda Shymkentte bolǵan oqıǵa. Onyń vıdeosy jelide tarady. Qazir birinshi márte synaqtan óte almaǵan kýrsantqa qaıta múmkindik beriledi. Araǵa 7 kún salyp emtıhandy qaıta tapsyra alady. Júrgizýshi kýáligin alýǵa úmitkerler orta eseppen 3-5 ret emtıhan tapsyryp baryp, ótip jatady», dedi Súıenish Ábdildın ortalyq kommýnıkasııalar qyzmeti alańynda ótken baspasóz máslıhatynda.
Onyń aıtýynsha, eger kýrsant birneshe sanat boıynsha júrgizýshi kýáligin alǵysy kelse, onda 7 kúndi kútpeı, synaqty kún saıyn tapsyra alady.
«Osy oraıda mamandandyrylǵan halyqqa qyzmet kórsetý ortalyqtarynda uzynsonar kezek paıda bolyp jatyr. Árıne, biz HQO jumysyn jetildirý jáne avtomattandyrý boıynsha shara qabyldap jatyrmyz. Biraq ol azdyq etip otyr. Osyǵan oraı biz Ishki ister mınıstrligimen birlesip avtomektepterdiń jaýapkershiligin qatańdatý jaǵyn qarap jatyrmyz. Iаǵnı, avtomektepterde synaq emtıhanyn engizbekpiz. Atalǵan shara kýrsanttardyń HQO-ǵa jetkilikti daıyndyqpen kelip, synaqtan birden súrinbeı ótýine septigin tıgizedi. Sonymen qatar ortalyqtardaǵy kezek sany azaıady», deıdi ol.
Aıana Toaǵanbek