Qazaqstandyq, álemniń 40-raketkasy Iýlııa Pýtınseva Rım WTA 1000 týrnıriniń úshinshi aınalymyna shyqty, dep habarlaıdy Egemen.kz.
Jarysty irikteý saıystarynan bastaǵan Iý.Pýtınseva ekinshi aınalymda álemniń burynǵy birinshi, qazirgi 10-raketkasy, «Úlken dýlyǵa» týrnıriniń eki márte jeńimpazy, ıspanııalyq Garbıne Mýgýrýsamen sheberlik baıqasty.
Buǵan deıin qarsylastar ózara eki ret kezdesip, ıspanııalyq tennısshi basym túsken bolatyn. Bul joly birinshi partııada G.Mýgýrýsa basymdyq tanytty – 6:3.
Ekinshi sette ıspanııalyq sportshy matchqa dop bergende, Iý.Pýtınseva qaırat tanyta aldy – 5:5. Sosyn taı-breıkte tarazy basyn aýdara bildi – 7:6 (7:4). Úshinshi, sheshýshi partııada qazaqstandyq tennısshi qarqynyn tipti údetti – 6:1.
Eki saǵat 17 mınýtqa sozylǵan match barysynda Iý.Pýtınseva 10 breık-poınttyń teń jartysyn paıdalandy. Qarsylasy 3 eıs, 3 breıkpen (6 breık-poınt) kózge tústi.
Iý.Pýtınseva júlde qory 2,5 mln eýrodan asatyn jarystyń shırek fınalyna shyǵý úshin álemniń 7-raketkasy, Týnıs ókili Ons Jabermen talasady.
О́tken aptada dál osyndaı Madrıd dodasynyń jeńimpazy atanǵan O.Jaber Rımde ekinshi aınalymda aýstralııalyq Aıla Tomlıanovıchti 7:5, 6:2 esebimen utty.
Elena Rybakına úshinshi aınalymda álemniń 29-raketkasy shveısarııalyq Hıl Belen Taıhmanmen kortqa shyǵady. Madrıd jarysynda E.Rybakına osy tennısshiden jeńilip qalǵan bolatyn.