Byltyr shilde aıynda skills.enbek.kz onlaın kásiptik oqytý platformasy iske qosylǵan sátten bastap 14,3 myńnan asa qazaqstandyq, onyń ishinde 8,7 myń jumyssyz azamat kýrstan ótkeni týraly sertıfıkat aldy. Platformada 24,3 myń adam tirkeldi, onyń 10,8 myńy 2022 jyly tirkelgen.
Eńbek jáne halyqty áleýmettik qorǵaý mınıstrliginiń baspasóz qyzmetiniń habarlaýynsha, oqýdan ótken 8,7 myń jumyssyz azamattyń 3 myńǵa jýyǵy negizinen Qyzylorda, Batys Qazaqstan, Túrkistan, Atyraý jáne Aqtóbe oblystarynyń jastary.
Avtorlar iske qosylǵan sátten bastap platformada ártúrli baǵyt boıynsha 117 kýrs jarııalady, onyń 63-i – tegin. Kýrstardyń uzaqtyǵy – 1-den 72 saǵatqa deıin. Eń kóp suranysqa ıe kýrstar – «Personaldy basqarý», «Sútti iri qara ósirý», «Kassır», «A-dan Iа-ǵa deıin qulpynaı ósirý» jáne «Unnan jasalǵan kondıter ónimderi, jiktelýi jáne daıyndalý tehnologııasy».
Platforma halyqtyń bilim deńgeıi men kásibıligin arttyrýǵa, mansaptyq damýdy yntalandyrýǵa jáne «ómir boıy oqytý» tujyrymdamasyn ilgeriletýge baǵyttalǵan. Bul marketpleıs qyzmetter naryǵy qaǵıdaty boıynsha onlaın kýrstarǵa qol jetkizýdi usynatyn halyqaralyq oqytý alańdaryna uqsas qurylǵan. Oqýǵa tikeleı skills.enbek.kz siltemesi arqyly nemese Elektrondyq eńbek bırjasynda (enbek.kz) «Onlaın oqytý» bólimin tańdaý arqyly ótýge bolady.
Platformada bilim alýshy oqytýdyń qolaıly qarqyny men tildi, materıaldy berýdiń yńǵaıly qaǵıdatyn óz betinshe tańdaıdy, bilim berý prosesindegi óziniń progresin baqylaı alady.
Oqý aıaqtalǵannan keıin bilim alýshy 70%-dyq shekti deńgeımen testileý tapsyrýy tıis. Onlaın kýrsty sátti aıaqtaǵan jaǵdaıda daǵdylardy ıgerý týraly sertıfıkat beriledi. Kýrsty aıaqtaýdyń mindetti sharty – stýdent tarapynan kýrsty baǵalaý. Bul sertıfıkat Elektrondyq eńbek bırjasynda tirkelgen kezde bilim alýshy jasaǵan túıindemede avtomatty túrde kórsetiledi. Qyzmetkerlerdi izdeý kezinde áleýetti jumys berýshi skills.enbek.kz-te sátti sertıfıkattardy kóredi.
Osy jyldyń 9 naýryzynan bastap platformada qoldanystaǵy fýnksıonal ońtaılandyrylyp, jańa servıster iske qosyldy. Atap aıtqanda, kýrstardy izdeý jetildirildi, sabaqtardyń túsinikti qurylymy jasaldy, oqý prosesin baqylaý jáne kýrs avtorlarymen jyldam ózara árekettesý múmkindigi paıda boldy. Kýrs avtorlary úshin yńǵaıly sabaq qurastyrýshy qoljetimdi, jarııalanǵan kýrstardyń statıstıkasy men tıimdiligin qaraý, sertıfıkattardyń ártúrli dızaıny qarastyrylǵan, sonymen qatar oqý qunyn aldyn ala esepteýge arnalǵan onlaın-kalkýlıator bar.