О́tken jyly kvazımemlekettik sektordyń 14 top-menedjeri qaramaǵyndaǵy qyzmetkerlerdiń sybaılas jemqorlyq áreketi úshin jaýapqa tartyldy. Bul týraly Sybaılas jemqorlyqqa qarsy is-qımyl agenttigi tóraǵasynyń orynbasary Ulan Sarqulov aıtty, dep habarlaıdy Egemen.kz.
«Kvazımemlekettik sektor sýbektileriniń basshylary sybaılas jemqorlyqtyń aldyn alý sharalaryna ózderi múddeli bolýy tıis, óıtkeni bul olardyń da jaýapkershiligi. Mysaly, ótken jyly kvazımemlekettik sektordyń 14 top-menedjeri qaramaǵyndaǵy qyzmetkerlerdiń sybaılas jemqorlyǵy úshin túrli tártiptik jaýapqa tartyldy», dedi Ulan Sarqulov Ortalyq kommýnıkasııalar qyzmetinde ótken baspasóz máslıhatynda.
Onyń aıtýynsha, memleket kvazımemlekettik sektorda sybaılas jemqorlyqqa qarsy birqatar sharany qolǵa alǵan.
«2021 jyldan bastap kvazımemlekettik sektorda esep berýdi kúsheıtý maqsatynda qoǵamdyq keńester qurylyp jatyr. Kvazımemlekettik sektorda sybaılas jemqorlyq buzýshylyqtarynyń yqtımal sýbektileriniń aýqymy keńeıtildi. Olarǵa satyp alýdy uıymdastyrý jáne ótkizý jóninde sheshimder qabyldaýǵa ýákiletti nemese memlekettik bıýdjetten jáne Ulttyq qordan qarjylandyrylatyn jobalardy irikteý men iske asyrýǵa jaýapty adamdar engizildi», dep túsindirdi U. Sarqulov.