Qazaqstan men Túrkııa arasyndaǵy áýe reısteriniń sany 13 mamyrdan bastap 124-ke deıin eki esege artady. Bul týraly Ankarada ótken Prezıdentter Qasym-Jomart Toqaev pen Rejep Erdoǵannyń kezdesýi barysynda Indýstrııa jáne ınfraqurylymdyq damý mınıstri Qaıyrbek О́skenbaev málimdedi, dep habarlaıdy Egemen.kz QR IIDM baspasóz qyzmetine silteme jasap.
«Bıyl 13 mamyrdan bastap Antalııa jáne Bodrým baǵyttarynda qatynaıtyn Air Astana, SCAT, Turkish Airlines áýekompanııalarynyń reıs sany birtindep artady. Qosymsha reıster Nur-Sultan, Almaty, Aqtaý, Aqtóbe, Atyraý, Qaraǵandy, Qostanaı, Oral, Shymkent jáne О́skemen arqyly iske asyrylady», dedi Qaıyrbek О́skenbaev.
SCAT Antalııaǵa aptasyna 29 jańa reısti Nur-Sultan (aptasyna 7 reıs), Almaty (6), Aqtóbe (3), Atyraý (3), Shymkent (2), Qaraǵandy (2), Oral (2), Qostanaı (2), Aqtaý (1), О́skemen (1) qalalarynan júzege asyrady. Al Air Astana Nur-Sultan jáne Almatydan Antalııa (7 reısten) men Bodrýmǵa (2 reısten) aptasyna 18 reıs jasamaq.
Turkish Airlines Antalııaǵa aptasyna 16 reısti Nur-Sultan (5 reısten), Almaty (4) jáne Qaraǵandydan (3) jáne Bodrýmǵa Nur-Sultan (2 reısten) men Almatydan (2) oryndaıdy.
Qaıyrbek О́skenbaevtyń aıtýynsha, 2022 jylǵy mamyrda Indýstrııa jáne ınfraqurylymdyq damý mınıstrligi memleketter arasyndaǵy áýe tasymalyn odan ármen arttyrý men ushý geografııasyn keńeıtý boıynsha eki eldiń áýe bıligi ókilderiniń kelissóz júrgizýi usynǵan. Bastama qoldaý taýyp, kelissózder osy jyldyń shildesinde Ystanbul qalasynda ótedi.
Aıana Toǵanbek