Qalam ustaǵan qaýymnyń qyzyǵy talaı aq paraqtarǵa júk bola berer. Sebebi, qaı jerde de maqalalarǵa arqaý bolar keıipker izdep júrgeniń. Keıde arnaıy izdep barsań, keıde keıipkeriń ózi jolyǵa ketedi. Lıýbamen de aıaq astynan saparlas boldyq. Qyzyǵy, áriptes bolyp shyqtyq.
Qazaq baspasóziniń qarashańyraǵyna 90 jyl tolǵan jyly, qysqy demalysty aýylda ótkizeıin dep, elge bet aldym. Aýylǵa týra bılet tabylmaı, Aqtóbe arqyly qaıtatyn boldym. Jol qysqartý úshin Hromtaýdan túsip, Aqtóbege baratyn bir top jolaýshy kólik jaldadyq. Men qatarly apaly-sińlili eki orys qyzy úsheýmiz bir kólikke otyrdyq. Jol qysqartaıyq dep, jón surastyq. «Egemende» isteıtinimdi aıtqanym sol edi, sol jaǵymdaǵy otyrǵan súıkimdi sary qyz «Sasha aǵaıdy bilemin ǵoı», degeni jymıyp. Birden túsine kettim, «Sasha aǵaıy» – Aleksandr Tasbolatov. Súıkimdi sary qyzdyń qazaqsha sóılegenine kóńilim jylyp, qaıda isteıtinin suradym. Tótenshe jaǵdaılar mınıstrliginiń baspasóz qyzmetiniń resmı ókilimin, áriptesińmin dep qoıdy. El basylymynyń 90 jyldyq mereıtoıymen quttyqtap, ótkizilip jatqan sharalardan habardar ekendigin ańǵartty. Dittegen jerge jetken soń súıkimdi sary qyzben telefon almasyp, qosh aıtystyq.
Sol kezdesýden 5 jyl ótken soń Lıýbamen áńgimelesýdiń sáti tústi. Sóıtsem, Lıýbov Yrǵyzdyń týmasy eken. «Men Aqtóbe oblysyndaǵy Ybyraı Altynsarın atamyz alǵash mektep ashqan, uly Abaı babamyzdyń atasynyń kindik qany tamǵan Yrǵyz degen kıeli jerde Shaposhnıkovtar áýletinde dúnıege keldim. Otbasymyzda menen ózge Nadejda esimdi apam bar. Mektepke deıin qazaq balabaqshasyna bardym, balalyq shaǵym qazaq balalarynyń arasynda ótti. Keıin Yrǵyz orys orta mektebin bitirdim. Mektepte oqyp júrgen kezimde «Qazaq tili jáne ádebıeti» páninen aýdandyq, oblystyq, respýblıkalyq olımpıadalarda, saıystarda júldeger atanyp júrdim. Mektep bitirgen soń Qazaq-Reseı ýnıversıtetiniń psıholog mamandyǵyn tańdap, oqýǵa túsip kettim. 2006 jyly respýblıkalyq «Maqsatym – til ustartyp, óner shashpaq» atty Abaı oqýlary baıqaýynda júldeger atanyp, keıin Tótenshe jaǵdaılar mınıstrligi jarııalaǵan kastıng arqyly talaıǵa arman bolǵan elordamyzǵa keldim. Mınıstrliktiń resmı ókili retinde qyzmet atqardym, búgingi kúni atalmysh mınıstrliktiń júıesindegi respýblıkalyq Daǵdarys ortalyǵynda jumys isteımin. TJM-ge qyzmet ete júrip, Kókshetaý tehnıkalyq ınstıtýtynda órt qaýipsizdigi mamandyǵy boıynsha bilim aldym. 2011 jyly Qarýly Kúshter vedomstvolarynyń áıel qyzmetkerleri arasyndaǵy Táýelsizdiktiń 20 jyldyǵyna arnalǵan alǵashqy «Jas qyran» baıqaýynda júldeli orynǵa ıe boldym. 2012 jyly dám aıdap, Baqyt esimdi qazaq jigitine turmysqa shyqtym. Jubaıym Baqyt kópbalaly otbasynan shyqqan. Ata-enem Almaty qalasynda turady. Qazaq halqynyń salt-dástúri men jón-joralǵysymen quda túsip, uzatý toıy jasalyp, kelin bolyp tústim. 2013 jyly otbasymyz qýanyshqa bólendi. Márııam esimdi bópemiz dúnıege keldi. Ananyń balasyna degen sezimin eshbir sózben jetkizý múmkin emes eken. Baqyt ta TJM Azamattyq qorǵanys departamentinde aǵa ofıser laýazymynda qyzmet etedi. Ata-analarymyzdyń quda-jekjat bolyp, syılastyqpen túsiniskenin kórip shúkirshilik etip, ósip-ónip jatyrmyz. Eki ulttyń da dástúrlerin qurmetteımiz. О́z memleketin súıetin otbasynda ósip kele jatqan kishkentaı Márııamnyń da óz eliniń patrıoty bolyp ósetinine senimim kámil. Týǵan elim Qazaqstan, memlekettik tildi bilý árkimniń paryzy dep sanaımyn. О́ıtkeni, elimizdiń bolashaǵy el tilimen birge kórkeımek.
Áke-sheshemniń ata-babasy azamattyq soǵystan keıin Orynbor gýbernııasynan kelgen eken. Al ata-anam osy Yrǵyzda týyp-ósken, taza yrǵyzdyqtar. Áli kúnge deıin sol Yrǵyzda turyp jatyr. Al atamnyń Uly Otan soǵysyna qatysqanyn maqtanyshpen aıta alamyn. Ájem Mordovııadan kelgen. Qazaq topyraǵynda ósip, japyraq jaıǵan Shaposhnıkovtar áýletinen taraǵan urpaqpyn. Baqytty shańyraǵymyz el damýynyń bir sıpaty shyǵar dep oılaımyn. О́ıtkeni, tynysh elde baqytty ǵumyr keship jatyrmyz. Ádemi álemimizdi eshqashan kir shalmasyn dep tileımin. Urpaq sanaly bolsa, ult damýy ilgerileıdi. Al bul úshin barlyǵymyz jaýapkershilikti bolýymyz qajet. Qoǵam durys baǵytta damýy úshin árkim óz-ózine jaýap berse jón, deıdi Lıýba qyz. Men ishteı jeńgeme súısindim. Ár qazaqstandyq osyndaı bolsa ıgi.
Venera TÚGELBAI,
Egemen Qazaqstan.